Демократия институтының жаңа зерттеуінде қазақстандықтардың 73,1 пайызы Құрылтай депутаттарының сайлауына қатысуға ниетті екенін білдірген. Сауалнама нәтижесінде партиялық рейтингтің алғашқы сатысына 70,3 пайыз қолдаумен «Әділет» шықты, – деп жазады Ertenmedia.kz.
Әлеуметтанулық зерттеу 2026 жылғы 20 шілде-6 тамыз аралығында жүргізілген. Оған еліміздің 17 облысы мен Астана, Алматы, Шымкент қалаларында тұратын 18 жастан асқан 8 мың респондент қатысқан. Зерттеу Демократия институтының қаржыландыруымен ұйымдастырылды.
Қатысушыларға «Егер Құрылтайға сайлау келесі жексенбіде өтсе, дауыс беруге барар ма едіңіз?» деген сұрақ қойылған. Респонденттердің 73,1 пайызы сайлау учаскесіне баруға дайын екенін айтқан. Демек, сауалнамаға қатысқан азаматтардың шамамен төрттен үші алдағы электоралдық науқанға қатысуға ниет білдіріп отыр.
Зерттеу барысында азаматтардың партиялық таңдауы да анықталған. Респонденттерден Құрылтай сайлауында қай саяси партияға дауыс беруге дайын екені сұралды. Нәтижесінде «Әділет» партиясы 70,3 пайыз көрсеткішпен рейтингтің бірінші орнына шыққан.
Екінші орында 5,6 пайыз қолдауға ие болған «Ауыл» партиясы тұр. «Ақ жолды» респонденттердің 5 пайызы таңдаса, Respublica партиясының көрсеткіші 4,9 пайызды құрады. Осы үш саяси ұйымның нәтижесі бір-біріне салыстырмалы түрде жақын.
Жалпыұлттық социал-демократиялық партияға сауалнамаға қатысқандардың 4,2 пайызы дауыс беруге дайын екенін білдірген. Қазақстан Халық партиясының көрсеткіші 3,9 пайыз болса, «Байтақ» партиясын таңдағандар үлесі 0,6 пайызды құрады. Осылайша сауалнамада жеті партияның электоралдық рейтингі көрсетілген.
Респонденттердің 5,5 пайызы нақты партиялық таңдау жасамаған немесе дауыс берудің өзге нұсқасын таңдаған. Оның 1,6 пайызы «барлығына қарсы» дауыс беретінін айтса, 3,9 пайызы қай партияны қолдайтынын әлі шешпеген. Институт мұны электоралдық енжарлықтың көрінісі ретінде бағалайды.
Демократия институты зерттеу нәтижесі азаматтардың сайлауға қатысуға дайындығы жоғары екенін көрсетеді деп есептейді. Ұйымның бағалауынша, мұндай көрсеткіш қоғамның саяси процестерге қызығушылығы сақталып отырғанын аңғартады. Сонымен бірге нақты сайлау нәтижесі сауалнамада айтылған ниеттен өзгеше болуы мүмкін.
Зерттеу іріктемесі Қазақстан халқының негізгі әлеуметтік-демографиялық құрылымына сәйкестендірілген. Респонденттер қала мен ауылда тұруы, жынысы және жасы бойынша қамтылған, ал 95 пайыз сенімділік ықтималдығы жағдайындағы статистикалық қателік ±1,1 пайыз деп көрсетілген. Демократия институты зерттеу нәтижесін Орталық сайлау комиссиясының 2026 жылғы 13 шілдедегі №-11-07/ЗТ-Қ-34 хабарламасы негізінде жариялаған.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
