2025 жылы Шығыс Қазақстан облысында құқық қорғау органдары тұрмыстық қылмыстардың, интернеттегі құқық бұзушылықтардың және қоғамдық тәртіп бұзушылықтардың алдын алу бойынша белсенді жұмысын жалғастыруда, сондай-ақ қоғамда «Заң және тәртіп» қағидасын нығайтуға баса назар аударуда, – деп хабарлайды Ertenmedia.kz ШҚО әкімінің баспасөз қызметіне сілтеме жасап.
Азаматтарды, ең алдымен кәмелетке толмағандарды және әйелдерді қорғауға, сондай-ақ қоғамдық қауіпсіздікке қауіп төндіретін құқық бұзушылықтардың алдын алуға ерекше көңіл бөлінуде.
Шығыс Қазақстан облысында тұрмыстық саладағы қылмыстардың жартысынан астамы алкогольдік масаң күйде жасалады. 2025 жылы полицияның өтініші бойынша өңір соттары ҚР ӘҚБтК-нің 54-бабы аясында 266 құқық бұзушыға алкогольдік ішімдіктерді тұтынуға тыйым салды. Бұл шара өткен жылы да қолданылып, 291 адамға қатысты шектеу енгізілген еді.
– Біз тұрмыстық қылмыстарға, әсіресе алкогольдік масаң күйде жасалатын қылмыстарға қарсы күресті жалғастырудамыз. Алкогольді тұтынуға қойылған тыйым оң нәтиже беруде, сондықтан біз бұл шараны қайталанған құқық бұзушылықтардың алдын алу үшін әрі қарай да қолданатын боламыз. Осы жыл Ішкі істер министрлігі тарапынан Алдын алу жылы деп жарияланды, сондықтан біз қылмыстың алдын алуға ерекше назар аударып отырмыз, – деді ШҚО ПД бастығы, полиция генерал-майоры Ерлан Омарбеков.
Жыл басынан бері өңірдегі дағдарыс орталықтарына 1 700-ден астам әйел психологтардың кеңесіне жіберілді, сондай-ақ 48 әйел мен 17 бала уақытша тұру үшін арнайы паналау орындарына орналастырылды.
Әйелдерге қатысты қылмыстар саны өткен жылмен салыстырғанда 7%-ға төмендеді – бұл полиция мен әлеуметтік қызметтердің бірлескен жұмысының оң нәтижесі.
Сонымен қатар, тұрмыстық салада құқыққа қайшы әрекеттер жасағаны үшін 1 315 адам әкімшілік жауапкершілікке тартылды.
Алайда, мәселе өзекті күйінде қалып отыр – 142 адам тұрмыстық зорлық-зомбылық құрбандарына жақындауға тыйым салатын қорғау ұйғарымдарын елемей, қайтадан жауапкершілікке тартылды.
2024 жылы есірткі, порнографиялық материалдар, суицидті насихаттау және заңсыз онлайн-казино сияқты тыйым салынған ақпараттарды таратқан 1 770 сайт бұғатталды.
2025 жылы бұл бағыттағы жұмыстар күшейтіліп, алғашқы үш айдың өзінде осындай 3 000-нан астам сілтеме бұғатталды.
Полиция азаматтарды қырағылық танытуға және күдікті интернет-ресурстар туралы хабарлауға шақырады, осылайша жас ұрпақ үшін қауіпсіз ақпараттық орта қалыптастыруға бірлесіп атсалысуға үндейді.
2024 жылы алкоголь ішіп, қоғамдық орындарда мас күйінде жүргені үшін 3 047 адам жауапкершілікке тартылды. 2025 жылы бұл көрсеткіш әлі де жоғары – 2 776 жағдай тіркелді.
Сондай-ақ, тыйым салынған орындарда темекі шегумен, оның ішінде қыздырылатын темекі өнімдері мен электронды сигареттерді пайдаланумен күрес жүргізілуде. 2024 жылы 130 адам әкімшілік жауапкершілікке тартылса, биыл бұл сан 100-ге жетті.
Ұсақ бұзақылық пен қоғамдық орындарды ластау мәселесі де өзекті. 2024 жылы бұзақылық үшін 335 адам жауапқа тартылса, 2025 жылы бұл көрсеткіш 324-ті құрады.
Қоғамдық орындарды ластаумен байланысты құқық бұзушылықтар да бақылауда. Өткен жылы 2 265 жағдай тіркелсе, 2025 жылы бұл көрсеткіш 1 128-ге жетті.
– Біз құқықтық мәдениетті қалыптастыру үшін қоғаммен белсенді өзара іс-қимыл жасаймыз. Қауіпсіздік пен тәртіп – бұл ортақ жауапкершілік, және біздің міндетіміз – құқық бұзушылықтарды анықтау ғана емес, сонымен қатар олардың алдын алу. «Заң және тәртіп» қағидасы әр азаматтың өмірінің негізіне айналуы тиіс, – деп атап өтті ШҚО ПД бастығы, полиция генерал-майоры Ерлан Омарбеков.
Шығыс Қазақстан облысының полиция департаменті заңды сақтау және қоғамдық тәртіпке құрметпен қарау – бұл тек міндет қана емес, сонымен қатар жайлы әрі қауіпсіз өмірдің негізі екенін еске салады. Әрбір азамат өзінің азаматтық жауапкершілігін түсініп, қоғамдық нормаларды сақтауға ұмтылуы тиіс.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
