Алматыда бұрынғы жігітінің жеке фотосуреттерін ғаламторға таратамын деп қорқытқанына шағымданған бойжеткен түн ортасында полицияға жүгінді, деп хабарлайды Ertenmedia.kz.
Қалалық полиция департаментінің мәліметінше, оқиға Алмалы ауданында болған. Бұрынғы ғашықтар арақатынасын үзгеннен кейін өзара сөзге келіп қалған, артынша ер адам қыздың жеке суреттерін әлеуметтік желіге жариялайтынын айтып қоқан-лоқы көрсеткен.
Түнгі жанжал және полицияның араласуы
Жәбірленушінің «102» пультіне түнгі уақытта жасаған шұғыл қоңырауынан кейін оқиға орнына Алмалы аудандық полиция басқармасының қызметкерлері дереу жетті.
Тәртіп сақшылары жастардың бұрын кездесіп жүргенін және арадағы келіспеушілік қарым-қатынас үзілгеннен кейін ушыққанын анықтады. Мән-жайды толық анықтау мақсатында екі тарап та полиция бөлімшесіне жеткізілді.
Полиция қазіргі уақытта оқиға бойынша жан-жақты тексеру жүргізіліп жатқанын мәлімдеді.
«Аталған дерек бойынша екі азамат та мән-жайды анықтау үшін Алмалы аудандық полиция басқармасына жеткізілді. Қазіргі уақытта оқиғаның толық мән-жайы анықталып жатыр. Тексеру қорытындысы бойынша заңға сәйкес тиісті шаралар қабылданады», – делінген қалалық полиция хабарламасында.
Қазақстандағы ұқсас деректер мен заң талабы
Елімізде соңғы кездері бұрынғы сүйіктісінің жеке фото мен видеоларын тарату арқылы қысым көрсету немесе ақша бопсалау деректері жиі тіркелуде. Жақында Ақтөбеде бұрынғы қызының жеке жазбаларын жариялаймын деп қорқытқан 38 жастағы ер адамға қатысты жеке өмірге қол сұғу бабы бойынша тергеу басталған еді. Ал Шығыс Қазақстан облысында таныс қызының рұқсатынсыз жеке суреттерін таратқан тұрғын үш жылға шартты түрде сотталған болатын.
Қылмыстық кодекске сәйкес, азаматтардың келісімінсіз жеке немесе отбасылық құпияны құрайтын мәліметтерді заңсыз жинау және тарату жеке өмірге қол сұғушылық деп танылып, қылмыстық жауапкершілікке әкеп соғады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
