Көлікте музыка тыңдаудың ең ыңғайлы жолы Bluetooth сияқты көрінеді. Телефонды қостың, тізімді аштың, жүре бересің. Бірақ дыбыс сапасын, тұрақтылықты және еркін таңдауды алдыңғы орынға қоятын адам үшін USB-флешка кейде әлдеқайда ұтымды шешімге айналады, деп жазады Ertenmedia.kz.
Бүгінгі жүргізуші музыканы көбіне стриминг сервистері арқылы тыңдайды. Бір жағынан қолайлы. Екінші жағынан, бәрі интернетке, қосымшаға, жазылымға және байланыс сапасына тәуелді. Ал флешкада тұрған музыка өз қолыңда болады. Интернет іздеп әуре болмайсың, байланыс үзіліп қалмайды, қосымша жаңартуды күтпейсің. Әсіресе алыс жолға шыққанда немесе байланыс нашар аймаққа барғанда мұның артықшылығы бірден сезіледі.
Ең маңызды тұстың бірі – дыбыс сапасы. Bluetooth ыңғайлы болғанымен, ол дыбысты қысылған форматта жеткізеді. Сол себепті тректің шынайы сапасы толық ашыла бермейді. Ал USB арқылы көлік жүйесіне тікелей қосылған файл анағұрлым таза естіледі. Егер музыкаңыз FLAC сияқты жоғалтусыз форматта сақталса, айырмашылық тіпті анық байқалады. Қымбат акустикасы бар көлікте де, орташа жүйеде де дыбыстың анықтығы, тереңдігі, аспаптардың бөлінуі жақсырақ сезіледі.
USB-флешканың тағы бір жақсы қыры еркіндік. Қай әнді сақтайтыныңызды өзіңіз шешесіз. Қай орындаушы, қай альбом, қай жанр ұнайды – бәрін бір жерге жинай беруге болады. Бір кездері адамдар кассетаға не дискіге өз қолымен ән теріп, жолға арнайы жинақ дайындайтын.
Флешка сол әдеттің заманауи нұсқасы секілді. Айырмасы – сыйымдылығы әлдеқайда үлкен. Мысалы, көлемі 256 гигабайт болатын флешкаға ондаған мың ән сыяды. Яғни бір шағын құрылғының ішінде тұтас музыкалық кітапхана жүруі мүмкін.
Тағы бір ұтымды жағы – жазылымға тәуелді болмау. Кей сервиске ай сайын ақша төлеп отыру керек. Ал әндер өзіңізде болса, оны флешкаға көшіріп, қосып қоясыз. Қосымша шығын жоқ. Музыканы өз қалауыңызша реттеп, сақтап, қажет кезде толықтырып отырасыз. Бір жағынан қарағанда, бұл цифрлық замандағы жеке фонотека сияқты.
Әрине, мұнда да бірер қарапайым шарт бар. Ең алдымен флешканы көлік жүйесі танитын форматта дайындау керек. Көбіне FAT немесе FAT32 форматы ыңғайлы келеді. Одан кейін бір ғана әнді салып, әуелі көлікте тексеріп көрген дұрыс. Себебі әр мультимедиа жүйесі барлық аудиоформатты бірдей оқи бермейді. Бір көлік MP3-ті еш мәселеcіз ашады, енді бірі AAC не FLAC-пен де жұмыс істей алады. Алдын ала тексеріп алсаңыз, кейін басы артық әуреге түспейсіз.
Контекст
Музыканы реттеп салудың да өз пайдасы бар. Барлық тректі бір папкаға үйіп тастағаннан гөрі, орындаушы, альбом, жанр бойынша бөліп қойған ыңғайлы. Компьютер арқылы мұны жасау жеңіл. Сонда көлік экранынан ән табу да оңай болады. Ұзақ жолда өзіңізге керек жинақты тез ашасыз.
Көп көлікте USB порты бар. Егер жоқ болса, кей жағдайда адаптер не сыртқы құрылғы қажет болуы мүмкін. Ал порт бар болғанымен жұмыс істемей тұрса, алдымен соны тексеру керек. Кейде мәселе флешкадан емес, көліктің өзіндегі жүйеден шығады.
Қысқасы, флешка ескі тәсіл сияқты көрінгенімен, көлікте музыка тыңдауға келгенде әлі де өте мықты құрал. Ол тұрақты жұмыс істейді, дыбыс сапасын жақсы сақтайды, интернет сұрамайды, ай сайынғы төлемге байламайды және музыканы өз талғамыңызбен жинауға мүмкіндік береді. Ыңғайлылық жағынан Bluetooth алда болуы мүмкін. Бірақ дыбыс тазалығы мен бақылау өз қолымда болсын дейтін адам үшін USB-флешка әлі де жеңілген жоқ.
Автокөлігіңіздің алдыңғы панелінде, әйнекке жақын орналасқан, кішкентай, қара түсті дөңгелек датчикті байқадыңыз ба? Көп адам бұл қандай да бір камера немесе навигациялық құрылғы деп ойлайды. Бірақ бұл шын мәнінде «күн сәулесінің датчигі» (Solar Load Sensor) деп аталатын ерекше құрылғы.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
