Германияның бұрынғы президенті Кристиан Вульф әлемге Түркия көбірек қажет болып отырғанын мәлімдеді, деп жазады Ertenmedia.kz.
Ол Ыстанбұлдағы Рахми М. Коча музейінде өткен Герман-түрік іскерлік кеңесі атқарушы кеңесінің отырысында сөйлеп, Анкараның жаһандық динамика өзгерген қазіргі кезеңдегі стратегиялық рөлі артып келе жатқанын айтты.
Вульфтың сөзінше, Германия Түркия үшін ең маңызды сауда серіктестерінің бірі болып қала береді. Алайда екі ел арасындағы экономикалық ынтымақтастықтың әлі толық ашылмаған үлкен әлеуеті бар. Сондықтан кездесудің басты мақсаты өзара жұмыс істейтін нақты бағыттарды айқындап, бар мүмкіндікті тиімді пайдалану.
Бұрынғы президент қазіргі Түркияны өзіне сенімді мемлекет ретінде сипаттады. Оның айтуынша, Германия мен Түркия арасындағы байланыста өзара сенім шешуші рөл атқарады. Вульф «әлем Түркияға Түркия әлемге мұқтаж болғаннан көбірек мұқтаж» деп, Анкараның халықаралық саясат пен экономикадағы салмағы күшейгенін атап өтті.
Ол Германияның Түркияда әлі де жағымды имиджге ие екенін айтты. Бұл екіжақты ынтымақтастықты кеңейтуге қолайлы жағдай қалыптастырады. Әсіресе сауда, өндіріс, логистика және инвестиция саласында жаңа мүмкіндіктер бар.
Вульф жаһандық жеткізу тізбектеріндегі өзгеріске де назар аударды. Оның айтуынша, бағыттар біртіндеп Ормуз бұғазынан Жерорта теңізі порттарына қарай ығысып келеді. Мұндай өзгеріс порттардағы жүктемені арттырып, Түркияның геосаяси және стратегиялық маңызын күшейтеді.
Түркияның географиялық орны Германия үшін де тиімді. Ел Еуропа, Азия, Таяу Шығыс және Жерорта теңізі арасындағы табиғи көпір қызметін атқарады. Бұған салыстырмалы түрде төмен еңбек шығыны мен дамып келе жатқан өндірістік база қосылады. Сондықтан Германия түрік нарығын тек сауда алаңы емес, өндіріс пен логистикадағы маңызды серіктес ретінде қарастырады.
Сонымен бірге Вульф Германияның да ішкі және сыртқы сын-қатерге тап болып отырғанын жасырмады. Жаһандық дағдарыстар, қақтығыстар және жеткізу тізбегіндегі тұрақсыздық қазіргі кезеңді күрделі етіп отыр. Бірақ оның пікірінше, дәл осындай уақытта Түркия үшін халықаралық аренада үлкен рөл атқаруға мүмкіндік бар.
Жалпы, Вульфтың мәлімдемесі Түркияның соңғы жылдары аймақтық ойыншыдан кеңірек геоэкономикалық орталыққа айналып келе жатқанын көрсетеді. Анкараның логистикадағы орны, өндірістік әлеуеті және көпвекторлы саясаты Германия мен Еуропа үшін барған сайын маңызды бола түсті.
Түркия статистика институтының ресми дерегіне сәйкес, наурызда жылдық инфляция 30,87 пайыз болған еді. Сәуірде тұтыну бағасының индексі бір айда 4,18 пайызға өсті. Ал 2025 жылғы желтоқсанмен салыстырғанда баға өсімі 14,64 пайызға жетті.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
