АҚШ-тың жаңадан сайланған президенті Дональд Трамп көмекшілеріне инаугурациядан кейін бірнеше күн ішінде Ресей президенті Владимир Путинмен телефон арқылы сөйлесуді ұйымдастыруды тапсырды, — деп хабарлайды ErtenMedia.
CNN мәліметінше, олардың телефон арқылы сөйлесетін күні әзірге белгісіз.
Арна дерекөздерінің айтуынша, Трамп Путинмен жеке сөйлесу Украинадағы қақтығысты тоқтататын шешім табуға көмектеседі деп сенеді.
Айта кетейік, бұған дейін Трамп Вашингтондағы ұлықтау алдындағы сөзінде ел алдында тұрған барлық дағдарысты шешетінін айтқан болатын. Ол АҚШ-тың иммиграциялық және сауда саясатын түбегейлі өзгертуге ниетті.
АҚШ президентінің инаугурациясы бүгін шығыс уақыты бойынша түстен кейін (Астана уақыты бойынша 22:00-ге) жоспарланған, сол уақытта Трамп Капитолий ғимаратында президенттік ант қабылдайды.
Еске салайық, 2024 жылы 5 қарашада Америка Құрама Штаттарында президент сайлауы өтті. Негізгі кандидаттар республикашылар атынан Дональд Трамп және демократтар атынан Камала Харрис болды. Бұл — елдің 47-ші президенті сайланатын 60-шы президенттік сайлау.
Трамп Вашингтон уақыты бойынша түнгі сағат екіде (Астана бойынша сағат 12:00-де) сайлаудың жеңімпазы деп жарияланды. Ол негізгі штаттың барлығында жеңіске жетті.
