KazService мұнай сервисі компанияларының одағы Қазақстан мұнай-газ саласындағы ең ықпалды тұлғалардың жаңа рейтингін жариялады.
Тізімге ірі бизнесмендер, мемлекеттік қызметкерлер мен сала басшылары кірген, деп хабарлайды Ertenmedia.
Рейтинг көшін Энергетика министрі Ерлан Ақкенженов бастады. Оның салада жүргеніне 20 жылдан асқан: Chevron Texaco-дан бастап, KMG International, «ҚазМұнайГаз» компанияларында басшылық қызметтер атқарған. 2025 жылы наурызда министр болып тағайындалғалы Ақкенженов энергетиканы цифрландыру мен экспорттық инфрақұрылымды дамыту мәселелерін қолға алған.
«Ол Қазақстанның мұнай өндіру көлемін ОПЕК+ квотасына емес, ішкі мүддеге сай анықтайтынын ашық мәлімдеп, ұлттық мүдде стратегиясын алға шығарды», – деп атап өтті KazService сарапшылары.
Рейтингтегі екінші орынға Қазақстанның ең бай адамдарының бірі, Назарбаевтың күйеубаласы Тимур Құлыбаев жайғасқан. Сарапшылардың айтуынша, ол мұнай-газ секторында он мыңнан астам адам жұмыс істейтін көптеген компанияның соңғы бенефициары болып табылады. Оның негізгі активі саналатын Halyk Bank саладағы басты кредиторлардың бірі.
«Жеке капиталдың ықпалының өсуі және активтерінің кеңеюі Құлыбаевтың рейтингте жоғары көтерілуіне себеп болды. Бұған қоса, ОПЕК елдерімен, еуропалық инвесторлармен берік байланысы мен энергетика саласын терең түсінуі маңызды рөл атқарды», – дейді сарапшылар.
Үшінші орынға Қарашығанақ пен Қашаған жобаларында Қазақстан мүддесін қорғайтын PSA компаниясының бас директоры Бекет Ізбастин шықты.
Төртінші орында бұрын «ҚазМұнайГазды» басқарып, қазір президенттің энергетика жөніндегі кеңесшісі болып отырған Мағзұм Мырзағалиев. Оның энергетика саласына ықпалы әлі де жоғары деп бағаланды.
Бұдан кейінгі орындарға Энергетика вице-министрлері Әлібек Жамауов, Арымбек Құдайберген және Ілияс Бақытжан орналасқан.
«ҚазМұнайГаздың» басқарма төрағасы Асхат Хасенов рейтингте сегізінші орында тұр. Сарапшылар оның төмендеуін КМГ-ның жаңа жобаларды іске қосуда және инвестиция тартуда ірі жетістіктер көрсете алмауымен байланыстырған. Хасеновтың бірінші орынбасары Құрманғазы Есқазиев тоғызыншы орынға шықса, QazaqGaz басқарма төрағасы Санжар Жаркешов үздік ондықты түйіндеді.
Рейтингке енген әйелдердің арасында ең ықпалдысы КМГ төрағасының орынбасары Диана Арысова (20-орын).
Тізімге Kazenergy қауымдастығының төрағасы Болат Ақшолақов (22-орын), «ҚазТрансОйл» бас директоры Арман Қасенов (26-орын), Атырау мұнай өңдеу зауытының жаңа басшысы Қуаныш Бішімов (33-орын), қазақстандық танымал кәсіпкерлер Кеңес Рақышев (58-орын) пен Данияр Әбілғазин (60-орын) де енген.
