Қытайдың беделді басылымы China Daily газетінде президент Тоқаевтың мақаласы жарық көрді, деп хабарлайды Ertenmedia.
Мемлекет басшысы мақаласында екі ел байланысының тарихи тамыры терең, көршілік пен өзара сенімге негізделгенін айта келе, бүгінгі таңда бұл қарым-қатынас сауда-экономикалық, көлік-логистика, энергетика, мәдениет пен туризм салаларын қамтыған стратегиялық әріптестікке ұласқанын атап өтті.
Президент Қазақстан мен Қытайдың былтырғы тауар айналымы 44 млрд доллардан асқанын, ал 2005 жылдан бері қытайлық компаниялардың Қазақстан экономикасына салған инвестициясы 27 млрд долларды құрағанын еске салды.
«Қазақ-қытай қатынасының негізінде ғасырларға жалғасқан достық, сенім мен өзара түсіністік жатыр. Бүгінде осы байланыс мемлекетаралық әріптестік пен стратегиялық серіктестіктің үлгісіне айналды. Екі елді 1700 шақырымнан астам шекара біріктіреді», – деді Тоқаев.
Екі елдің тарихи байланысы Ұлы Жібек жолы кезеңінен басталады. Қытай төрағасы Си Цзиньпиннің «Бір белдеу бір жол» бастамасын 2013 жылы Астанада жариялауы осы дәстүрдің жаңа кезеңге аяқ басуына мүмкіндік берді.
Мақалада екі ел арасындағы көлік дәліздерін дамытуға ерекше көңіл бөлінген. Оның ішінде Транскаспий халықаралық көлік бағыты («Орта дәліз») және темір жол инфрақұрылымын жаңарту жобалары бар:
- Достық–Мойынты темір жолының іске қосылуы Қытай–Еуропа бағытындағы Қазақстанның транзиттік әлеуетін бес есеге арттырады;
- Сиань қаласында сауда-логистика орталығы ашылды;
- Ақтау портында Ляньюньган портымен бірлескен контейнерлік хабтың іске қосылуы Қазақстанның теңіз логистикасын жаңа деңгейге шығарды.
«Біздің серіктестігіміз тек экономикамен шектелмейді. Мәдени байланыстың тамыры терең. Былтыр Қытайда өткен Қазақстанның туризм жылының табысынан кейін, биыл Қазақстанда Қытай туризмінің жылы жарияланды. Бұл шара екі ел азаматтарының бір-бірінің тарихы, мәдениеті мен табиғатын тануына жол ашады», – деді президент.
Сонымен қатар Тоқаев Шанхай ынтымақтастық ұйымының аймақтық тұрақтылықты қамтамасыз етудегі рөліне де тоқталды. Оның айтуынша, алда өтетін Тяньцзиньдегі ШЫҰ саммиті ұйымды реформалау мен бірлескен стратегияларды талқылаудың маңызды алаңы болмақ.
Президент мақаласын Си Цзиньпиннің «Қазақстан мен Қытай модернизация жолындағы серіктестер» деген сөзімен аяқтады. Оның пікірінше, ортақ мақсат пен бірлескен әрекет екі елдің ғаламдық сын-қатерлерді еңсеруіне жол ашады.
