Қазақстанда жаңа кредиттік рақымшылық болмайды. Қаржы нарығын реттеу және дамыту агенттігінің басшысы Мәдина Әбілқасымова несиені жаппай кешіру бюджетке үлкен салмақ түсіріп, халықты жауапсыздыққа итермелейді деп мәлімдеді, деп хабарлайды Ertenmedia.
Мәжіліс кулуарында журналистер сауалына жауап берген Әбілқасымованың айтуынша, мемлекет амнистия өткізу үшін азаматтардың қарызын бюджет есебінен өтеуге мәжбүр болады. Ал бұл үлкен шығын.
«2019 жылғы кредиттік амнистиядан кейін қарызы кешірілген азаматтардың бір бөлігі қайтадан несие алып, тағы да төлем мерзімін өткізіп алды. Яғни халық арасында «5–6 жыл сайын несие кешіріледі, қарызды қайтармаса да болады» деген қате түсінік қалыптасқан. Осыдан азаматтар өз міндетіне салғырт қарайды, ал бюджетке ауыртпалық түсе береді», – деді агенттік басшысы.
Әбілқасымова бюджет мұндай шығындарды үздіксіз көтере алмайтынын ескертіп, агенттік азаматтарды қорғаудың балама жолын қарастырғанын айтты.
«Бізді бюджет қолдамайды. Сондықтан жаңа банк заңнамасында негізгі міндет ретінде қаржылық қызмет тұтынушыларының құқығын жан-жақты қорғау көзделген. Біз мәселені кешіру арқылы емес, азаматтарды жауапты әрі сауатты қарыз алуға үйрету арқылы шешуді ұсынамыз», – деп қорытындылады ол.
Тұшымды контентті Ertenmedia-ның телеграм арнасынан оқыңыз.
Банктер мен биліктің арасындағы «махаббат»: Базарбек ашқан Pandora жәшігі
