Ерте, ерте, ертеде орманның шетінде бір ешкі өмір сүріпті. Оның жеті лағы болыпты. Лақтарының біреуі қара, қалған алтауы аппақ, сүп-сүйкімді екен. Ешкі күнде орманға барып, шөп жеп, балаларын асырайды екен.
Бір күні ешкі орманға кетер алдында лақтарын жинап алып, ақылын айтыпты:
«Балаларым, мен жоқта ешкімге есік ашпаңдар. Орманда қасқыр жүреді. Ол айлакер, алдауы мүмкін. Мен келгенде: “Балаларым – лақтарым, аналарың келді, сүт әкелді” деп әндетемін. Сол кезде ғана есік ашыңдар», – деп ескертіп кетіпті.
Ешкі кетісімен, бұта арасында тығылып тұрған қасқыр бәрін естіп алады. Ол ешкінің үйіне келіп, есікті қағып, жуан дауысымен сол әнді айта бастайды. Бірақ лақтар оның даусынан бірден бөтен екенін байқап, есік ашпай қояды.
Қасқыр ашуланып, амалын табуға тырысады. Ол базарға барып, саудагерден бор сатып алып, соны жейді. Даусы жіңішкергендей болады. Қайтып келіп ән салады, бірақ лақтар тағы да алданбайды.
Сонда қасқыр ұстаханаға барып, тамағын «жөндетеді». Даусы мүлде ешкінікіндей жіңішке болып шығады. Қуанып қайта келеді. Бірақ бұл жолы да лақтар оның аяғына қарап, қара екенін байқап, есік ашпай қояды.
Қасқыр тағы да айлаға көшеді. Ол наубайшыға барып, аяғына ұн сеуіп, аппақ етіп алады. Сосын үйге қайта келіп, әнін әдемілеп айтады. Лақтар бұл жолы дауысына да, ақ аяғына да сеніп, есікті ашып жібереді.
Қасқыр үйге кіре сала, лақтар жан-жаққа қашып, тығыла бастайды. Бірі пештің артына, бірі шкафтың ішіне, бірі үстелдің астына жасырынады. Бірақ қасқыр бәрін тауып, алты лақты жеп қояды. Тек бір қара лақ қана сағаттың артына тығылып, аман қалады.
Қарны тойған қасқыр далаға шығып, ағаштың түбіне жатып, қорылдап ұйықтап кетеді.
Көп ұзамай ешкі орманнан қайтып келеді. Үйге кірсе, есік ашық тұр, іші тым-тырыс. Ешкі қатты алаңдап, лақтарын шақырады. Сол кезде қара лақ жылап шығып, болған оқиғаның бәрін айтып береді.
Ешкі қайғыдан қатты күйзеледі, бірақ өзін тез жинап алады. Қара лағымен бірге сыртқа шығып қараса, қасқыр ағаш түбінде ұйықтап жатыр екен. Ешкі батылдық танытып, қасқырдың қарнын мүйізімен жарып жібереді. Сол кезде ішінен алты лақ аман-есен шыға келеді.
Ешкі мен лақтардың қуанышында шек болмайды. Олар бір-бірін құшақтап, мәз болады.
Сосын ешкі қасқырдың қарнын таспен толтырып, қайта тігіп қояды. Қасқыр ештеңе сезбей ұйықтап жата береді.
Бір кезде қасқыр оянып, қатты шөлдейді. Құдыққа барып су ішпек болады. Бірақ ішіндегі ауыр тастар оны төмен тартып, қасқыр құдыққа құлап кетеді де, батып өледі.
Осылайша ешкі мен оның жеті лағы қайтадан аман-есен бірге өмір сүріп, енді ешқашан бөтенге есік ашпау керегін жақсы түсінеді.
Бұл ертегі балаларға сақтық пен ақылдылықтың маңызын үйретеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
