Kaspi.kz үшінші жыл қатарынан қазақстандық заманауи музыканың ең ірі фестивальдерінің бірі OYU Fest-тің бас серіктесі болады, деп жазады Ertenmedia.kz.
Биыл OYU Fest 4 және 5 шілде күндері Алматыдағы «Бірінші мамыр тоғандары» демалыс саябағында өтеді. Екі күнге созылатын музыкалық алаңда танымал жас орындаушылар, қазақстандық сахнада жаңа есім ретінде танылып келе жатқан өнерпаздар және арнайы екі хедлайнер өнер көрсетеді. Ұйымдастырушылар басты қонақтардың есімін әзірге құпия ұстап отыр.
Kaspi.kz үшін OYU Fest-пен серіктестік тек демеушілік жоба ретінде ғана қарастырылмайды. Компания бірнеше жылдан бері заманауи қазақ музыкасының кең аудиторияға жетуіне қолдау көрсетіп келеді. Kaspi.kz басшысы әрі негізін қалаушылардың бірі Михаил Ломтадзе қазіргі қазақ музыкасы Қазақстанда ғана танылып қоймай, елден тыс жерлерде де миллиондаған тыңдарманның ықыласына бөленіп отырғанын атап өтті.
Оның айтуынша, OYU жобасы талантты орындаушылардың үлкен сахнаға шығуына, ал көрерменнің жаңа жұлдыздарды ертерек тануына мүмкіндік беріп жүр. Kaspi.kz бірнеше жылдан бері фестивальді қолдап келеді және қазақстандық музыкаға қызығушылықтың артып келе жатқанын қуана қабылдайды. Михаил Ломтадзе көрерменді фестивальге шақырып, қатысушыларға жарқын көңіл-күй, жақсы музыка және жаңа белес тіледі.
Қазақ музыкасын үлкен аудиторияға шығаратын серіктестік
Өткен жылы OYU Fest Алматы мен Астанада 25 мың көрермен жинады. Соңғы бес жыл ішінде фестиваль сахнасында қазақстандық музыканың әр кезеңі мен әр бағытын танытатын көптеген танымал орындаушы өнер көрсетті. Олардың қатарында Ninety One, «Ирина Кайратовна», Қайрат Нұртас, Alem, Shiza, Yenlik, Dudeontheguitar, Daiynball, ALPHA, «Дос-Мұқасан», Moldanazar, Ayau, Dequine және басқа да өнерпаз бар.
OYU Fest кейінгі жылдары жаңа буын музыкасының ашық алаңына айналды. Мұнда поп, инди, хип-хоп, этно-әуен, электронды бағыт және заманауи сахна мәдениеті бір кеңістікте тоғысады. Фестивальдің басты ерекшелігі де осында. Жоба тыңдарманға дайын музыкалық трендті ғана ұсынбай, қазақстандық сахнаның ішкі қозғалысын, жаңа есімдер мен жаңа дыбысты танытады.
OYU Fest 2026 фестиваліне билетті Kaspi.kz мобильді қосымшасындағы Kaspi Travel сервисі арқылы сатып алуға болады. 12 жасқа дейінгі балаларға, зейнеткерлерге, сондай-ақ 1 және 2-топтағы мүгедектігі бар адамдарға фестивальге кіру тегін қарастырылған.
Kaspi.kz өз миссиясын клиенттер мен серіктестердің өмірін жақсартатын инновациялық өнімдер мен сервистер жасау деп сипаттайды. Компанияның қызметін Қазақстан мен Түркияда 25 миллионнан астам клиент және 900 мың серіктес пайдаланады. Қазақстанда Kaspi.kz суперқосымшасы төлем, электронды коммерция, онлайн супермаркет, финтех, саяхат, хабарландыру, мемлекеттік қызмет және басқа да сервисті біріктіреді. Түркияда компания елдегі жетекші электронды коммерция платформасы Hepsiburada-ның иесі саналады.
OYU Fest пен Kaspi.kz серіктестігі қазақстандық музыка индустриясының коммерциялық әлеуетін де, мәдени салмағын да көрсетеді. Жас орындаушы үшін үлкен сахна, тыңдарман үшін жаңа есім, нарық үшін сапалы контент, ал қала үшін жазғы мәдени оқиға қалыптасып келеді. Алматы шілде айының алғашқы күндерінде тағы да жаңа қазақ музыкасының басты орталығына айналмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
