Балқаш қаласында жазғы маусымның басты мәдени-туристік оқиғаларының бірі Balkhash Tour Fest-2026 фестивалі басталды, деп жазады Ertenmedia.kz.
Екі күнге созылатын ауқымды шараға қатысу үшін Балқашқа мыңдаған қонақ келді. Фестиваль бағдарламасына спорттық жарыстар, концерттер, гастрономиялық рекордтар, отбасылық ойын-сауық және жағажай демалысына арналған түрлі іс-шара енгізілген.
Биылғы фестивальдің басты ерекшелігі дрон шоу. Ұйымдастырушылар алғаш рет Балқаш аспанын жүздеген жарқыраған дронмен көмкеріп, көл жағасында әсерлі көрініс ұсынбақ. Мұндай технологиялық қойылым фестивальдің ең есте қаларлық сәттерінің біріне айналады деп күтіледі.
Белсенді демалысты ұнататындар үшін бірнеше спорт алаңы мен жарыс ұйымдастырылған. Қатысушылар жағажайдағы сайыстарға, командалық ойындарға және ашық аспан астындағы спорттық бағдарламаларға қатыса алады. Балалар мен ересектерге арналған бөлек ойын-сауық аймақтары да қарастырылған.
Фестиваль қонақтары үшін концерттік бағдарлама да дайындалды. Сахнада танымал өнерпаздар мен жергілікті шығармашылық ұжымдар өнер көрсетеді. Ал гастрономиялық алаңдарда Балқаш өңірінің дәмі мен жергілікті өнімдері ұсынылады.
Balkhash Tour Fest-2026 Балқаштың туристік әлеуетін кеңінен танытуға бағытталған. Көл жағасындағы фестиваль өңірге келетін туристер санын арттырып, жазғы демалыс мәдениетін жаңа деңгейге көтеруге мүмкіндік береді.
Ұйымдастырушылардың айтуынша, шара тек ойын-сауық емес, Балқашты отбасылық, спорттық және экологиялық туризм орталығы ретінде насихаттайтын маңызды алаңға айналмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
