Үкімет Президент Қасым-Жомарт Тоқаевтың ұлттық экономика моделін жаңғырту жөніндегі тапсырмаларын жүзеге асыруда. Бұл бағыттағы жұмыстардың арқасында макроэкономикалық тұрақтылықты сақтау, бизнес ахуалды жақсарту және инвестиция тарту бағытында жүйелі шара қабылдап келеді, деп жазады Ertenmedia.kz.
Экономикалық саясатта жаңа инвестициялық кезеңді іске қосуға, адал бәсекелестік ортаны қалыптастыруға және болжамды фискалдық саясатты орнықтыруға басымдық берілген. Қабылданып жатқан шешімдер жеке капиталдың белсенділігін арттырып, нақты сектордың ұзақмерзімді дамуына жағдай жасауға бағытталған.
Қазіргі экономикалық өсім өндірістің кеңеюі, нақты сектордың қарқынды дамуы және салаларды әртараптандыру есебінен қамтамасыз етіліп отыр. Елдің көлік-транзиттік әлеуетін нығайту да өсімнің негізгі тетігінің біріне айналған. Инфрақұрылымдық жобалар ішкі нарықты жандандырып қана қоймай, Қазақстанның өңірлік логистикадағы орнын күшейтуге мүмкіндік береді.
Мемлекет әлеуметтік міндеттемелерді де жүйелі орындап, азаматтарға берілетін төлем көлемін ұлғайту жұмысын жалғастыруда. Елді мекендерде спорт инфрақұрылымы салынып, тұрғындардың бұқаралық спортпен айналысуына жағдай жасалып жатыр. Сонымен бірге ұзақмерзімді келісімшарт тетігі арқылы отандық кәсіпорындардың өніміне кепілді өткізу нарығын қалыптастыру көзделген.
2026 жылдың алғашқы алты айындағы көрсеткіштер жүргізіліп жатқан экономикалық саясаттың тұрақты нәтиже бергенін аңғартты. Негізгі капиталға салынған инвестиция көлемі 9,5 триллион теңгеден асып, макроэкономикалық өсімнің басты драйверіне айналды. Жеке инвестиция 21,4 пайызға өсіп, жалпы инвестициялық өсім қарқынынан жоғары нәтиже көрсетті.
Көрсеткіштердің жақсаруына кәсіпкерлерге түсетін әкімшілік қысымның азаюы, мемлекеттік сатып алу мерзімінің үш есе қысқаруы және цифрлық шешімдердің енгізілуі ықпал етті. Рәсімдердің жеңілдетілуі бизнеске кететін уақыт пен шығынды азайтып, мемлекеттік органдармен өзара іс-қимылды жеделдетті. Цифрландыру сатып алу, есептілік және бақылау жүйесінің ашықтығын арттыруға мүмкіндік берді.
Елде жаңа Салық және Бюджет кодекстерін жүзеге асыру басталды. Құжаттар нақты сектор үшін қолайлы орта қалыптастыруға, бюджет тәртібін күшейтуге және мемлекеттік қаражаттың жұмсалуын бақылауды жетілдіруге бағытталған. Үкімет аталған реформалар инвестициялық белсенділікті арттырып, кәсіпкерлік ортадағы болжамдылықты күшейтеді деп есептейді.
Жүйелі реформалар мен мемлекеттік қолдау тетігі елдегі бизнес жүргізу шарттарын біртіндеп өзгертіп келеді. Негізгі назар отандық тауар өндірушілердің нарыққа қолжетімділігін кеңейтуге, жеке инвестицияны ынталандыруға және экономиканың тұрақты өсуін қамтамасыз етуге аударылған. Қабылданған шаралардың нәтижесі алдағы кезеңде өндіріс көлемі, жаңа жұмыс орны және салық түсімі арқылы бағаланбақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
