Қазақстан Президенті Қасым-Жомарт Тоқаев Шанхайда Қытай Халық Республикасының Төрағасы Си Цзиньпинмен келіссөз жүргізді. Кездесуде саяси диалог, сауда, инвестиция, мәдени байланыс және халықаралық ұйымдар аясындағы ықпалдастық талқыланды, – деп жазады Ertenmedia.kz.
Мемлекет басшысы Қытай төрағасына Бүкіләлемдік жасанды интеллект конференциясына шақырғаны үшін алғыс білдірді. Президент жаһандық технологиялық форумның «Шығыс інжу-маржаны» атанған Шанхайда өтуінде айрықша символдық мән барын атап өтті. Сонымен қатар Си Цзиньпинді Қытай Коммунистік партиясының құрылғанына 105 жыл толуымен құттықтады.
Қасым-Жомарт Тоқаев Қытайдың халықаралық аренадағы беделі мен соңғы жылдардағы даму қарқынына жоғары баға берді. Оның айтуынша, Қазақстан Бейжіңмен қалыптасқан мәңгілік әрі жан-жақты стратегиялық серіктестікті тереңдетуге мүдделі. Соңғы кезеңде екі мемлекет арасындағы саяси диалогтың қарқыны айтарлықтай күшейген.
Президент сауда-экономикалық қатынаста салмақты нәтижеге қол жеткізілгенін айтты. Қытай Қазақстанның ең ірі сауда серіктесіне айналып, еліміздің экономикасына салған инвестиция көлемі 30 миллиард долларға жетті. Былтыр екіжақты тауар айналымы рекордтық 49 миллиард долларды құрады.
Қазір Қазақстанда Қытай капиталының қатысуымен 8,5 мыңнан астам компания жұмыс істейді. Бірлескен жобалар өнеркәсіп, энергетика, газ химиясы, машина жасау және ауыл шаруашылығы секілді экономиканың тірек салаларын қамтиды. Мұндай кооперация инвестиция тартумен қатар жаңа технологияны игеруге және өндірістік тізбекті кеңейтуге мүмкіндік береді.
Келіссөз барысында мәдени-гуманитарлық ықпалдастыққа да назар аударылды. Президенттің мәліметінше, өткен жылы Қазақстанға Қытайдың бір миллионнан астам азаматы келген. Екі елдің астанасында мәдени орталықтар ашылып, Қазақстанда кәсіби-техникалық білім беруге бағытталған Лу Бань шеберханалары жұмыс істеп жатыр.
Шанхай келіссөзі Қазақстан бағытын айқындады
Қасым-Жомарт Тоқаев осындай бастамаларды қазақ және қытай халқы арасындағы өзара сенім мен достықтың көрінісі деп бағалады. Туризмнің жандануы, білім беру жобалары мен мәдени алмасу мемлекетаралық серіктестіктің қоғамдық негізін нығайтып келеді.
Тараптар халықаралық күн тәртібін де талқылады. Қазақстан мен Қытай жаһандық қауіпсіздік пен орнықты даму мәселесінде ұқсас ұстаным танытып, Біріккен Ұлттар Ұйымы, Шанхай ынтымақтастық ұйымы, Азиядағы өзара іс-қимыл және сенім шаралары жөніндегі кеңес, сондай-ақ «Орталық Азия – Қытай» форматы аясында тығыз байланыс орнатқан.
Си Цзиньпин Қытай мен Қазақстан арасындағы мәңгілік жан-жақты стратегиялық серіктестік жоғары деңгейге көтерілгенін айтты. Қытай төрағасының пікірінше, екіжақты байланысты одан әрі кеңейтуге мол мүмкіндік бар. Ол Қазақстанның Қытайға қатысты достық саясаты екі ел халқының мүддесіне сай келетінін жеткізді.
ҚХР төрағасы Қасым-Жомарт Тоқаевтың бастамасымен жүргізіліп жатқан ауқымды реформаларға жоғары баға берді. Сондай-ақ Қазақстан Президентін жаңа Конституцияның қабылдануымен құттықтап, алдағы Құрылтай сайлауына табыс тіледі.
Келіссөз қорытындысында Қазақстан мен Қытай үкіметтері арасындағы 2027–2030 жылдарға арналған сауда-экономикалық ынтымақтастық бағдарламасы мен жол картасына қол қойылды. Құжаттар екі мемлекеттің сауда, инвестиция және өндірістік кооперация бағытындағы ұзақ мерзімді жұмысын жүйелеуге арналған.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
