Бостандық ауданындағы көшелердің жүктемесі, инженерлік желілердің жағдайы және абаттандыруға мұқтаж аумақтар интерактивті карта арқылы анықталып жатыр. Алматы қаласы Бостандық ауданының әкімі Азамат Қалдыбековтің айтуынша, жаңа тәсіл жұмысты дұрыс жоспарлауға және тұрғындарға әр жобаның мәнін ашық түсіндіруге мүмкіндік береді, – деп жазады Ertenmedia.kz.
Ауданда жүзеге асырылатын жобалар инженерлермен, салалық мамандармен және сарапшылармен бірлесіп талқыланады. Әр учаске бойынша жеке шешім қабылданып, алдымен оның техникалық жағдайы зерттеледі.
Интерактивті картада көлік қозғалысы тығыз көшелер, электр желілеріне шамадан тыс жүктеме түсетін аумақтар және абаттандыруды қажет ететін нүктелер белгіленген. Қалдыбековтің ойынша, мұндай жүйе жұмыстың басым бағытын нақты дерекке сүйеніп анықтауға көмектеседі.
– Интерактивті картадан қай көшеде жүктеме жоғары екенін, қай жердегі инженерлік желіні ауыстыру керегін көріп отырмыз. Шешім мамандардың қорытындысы мен нақты жағдайға қарай қабылданады, – деді Азамат Қалдыбеков.
Аудан әкімінің айтуынша, көшені жөндеу туралы шешім оның сыртқы көрінісіне ғана қарап қабылданбайды. Алдымен жер астындағы су, жылу, кәріз және электр желілерінің жай-күйі тексеріледі. Инженерлік инфрақұрылымы дайын емес аумаққа асфальт төсеу кейін жолды қайта қазуға әкелуі мүмкін.
Кейбір көшелердегі абаттандыру жұмысының уақытша тоқтатылуы да осы мәселеге байланысты. Қалдыбековтің мәліметінше, жекелеген учаскеде жұмыс басталғаннан кейін инженерлік желілердің толық тартылмағаны анықталған. Сондықтан сыртқы абаттандыру коммуникация мәселесі шешілгенге дейін тоқтатылды.
Жароков, Розыбакиев, Тимирязев және Жандосов көшелерінің бірқатар бөлігінде электр желілерінің қуаты арттырылып жатыр. Аталған жұмысқа демеушілер де қолдау көрсетуде.
17-22 шілде аралығындағы қатты ыстық кезінде электр инфрақұрылымына айрықша салмақ түскен. Кей трансформатор мен кабель шамадан тыс жүктемеге шыдамаған. Аудан әкімінің ойынша, мұндай жағдайда апат болған жерді жөндеу жеткіліксіз. Желіні болашақтағы жүктемеге бейімдеп, өткізу қабілетін күшейту қажет.
Инженерлік желілерді ауыстыру абаттандыру жұмыстарымен қатар жүргізіледі. Жер қазылғаннан кейін жол, тротуар және көгал толық қалпына келтірілуге тиіс. Негізгі жұмыстың басым бөлігін 1 қыркүйекке дейін аяқтау жоспарланған.
Азамат Қалдыбеков тұрғындар тарапынан айтылатын сын мен ұсыныстың маңызына да тоқталды. Оның айтуынша, наразылықтың бір бөлігі құрылыс жұмысының өзінен емес, ақпараттың жеткіліксіздігінен туындайды. Тұрғындар жөндеудің не себепті тоқтағанын, қашан жалғасатынын және нәтижеге кім жауап беретінін білгісі келеді.
– Жұмысты күн сайын айтып отырғанымызбен, ресми ақпарат кейде тұрғындарға толық жетпей қалады. Сондықтан журналистер мен блогерлер арқылы қай жерде қандай жоба іске асып жатқанын, жұмыстың не үшін тоқтағанын және қашан аяқталатынын ашық түсіндіруіміз керек, – деді аудан әкімі.
Қалдыбековтің айтуынша, сырттай қарағанда кей жөндеу баяулап немесе тоқтап қалғандай көрінуі мүмкін. Алайда жұмыс барысында жер астынан қосымша инженерлік мәселе анықталатын жағдай кездеседі. Техникалық себеп дер кезінде түсіндірілмесе, құрылыс қоғамдық сенімсіздікке ұласады.
Осыған байланысты аудан әкімдігі жобалардың тізімін, мерзімін және орындалу мәртебесін ашық көрсетуге басымдық беріп отыр. Тұрғындарға жол жөндеу, инженерлік желілер, абаттандыру, салынып жатқан және аяқталған қоғамдық кеңістік туралы мәлімет беріледі.
Бостандық ауданында бюджет есебінен бөлек, демеушілердің қолдауымен жүзеге асатын ірі жобалар бар. Соның бірі — аумағы шамамен 6, 5 гектар болатын жаңа спорт саябағы.
Аудан әкімінің мәліметінше, жобаны қолдауға Алматыда жұмыс істейтін кәсіпкерлер мен бизнес өкілдері қатысқан. Саябақтың тұжырымдамасын әзірлеу кезінде келушілер саны, аумақтың күнделікті жүктемесі және әр жастағы тұрғындардың қажеттілігі ескерілген.
Жаңа кеңістікте спортпен шұғылдануға, серуендеуге және отбасымен демалуға арналған аймақтар қарастырылады. Қалдыбековтің ойынша, жоба бизнестің қалалық инфрақұрылымды дамытуға қатысуының тиімді үлгісіне айналуы мүмкін.
Есентай өзенінің жағалауын абаттандыру жұмысы да демеушілердің көмегімен жүргізіліп жатыр. Аудан әкімінің айтуынша, өзен арнасына су өткізетін инженерлік нысан ретінде ғана қарауға болмайды. Жағалау тұрғындарға ашық, жасыл әрі қауіпсіз қоғамдық кеңістікке айналуға тиіс.
Жоба аясында аумақты көгалдандыру, жаяу жүргінші жолдарын салу және қауіпсіздік талаптарын сақтау қарастырылған. Демеушілік қаржы жұмысты жеделдеткенімен, әр нысан қала құрылысы, сәулет және экология талаптарына толық сәйкес болуы қажет.
Бұқар жырау бульвары, Шагабутдинов көшесі және Есентай өзеніне жақын үйлердің тұрғындары да аумақты абаттандыру жөнінде ұсыныс білдірген. Қалдыбековтің айтуынша, тұрғындардың өтініші ескеріліп, демеушілермен бірлесіп жапон бағы үлгісіндегі қоғамдық кеңістік салу мәселесі қарастырылып жатыр. Жобаның болжамды құны 5 млрд теңге көлемінде бағаланған.
Ауданда ірі нысандармен қатар, шағын қоғамдық кеңістіктерді жаңарту жұмысы жүріп жатыр. Бюджет қаражатына 14 аумақ абаттандырылуда. Тағы 13 кеңістік демеушілердің қолдауымен көркейтіледі.
Аталған жобаларға аулалар, бос жатқан учаскелер, жаяу жүргінші жолдары, көгалдар, балалар және спорт алаңдары кіреді. Әр нысан тұрғындардың ұсынысы, инженерлік мүмкіндік және интерактивті картадағы мәлімет негізінде таңдалады.
Азамат Қалдыбековтің ойынша, қаладағы абаттандырудың сапасы салынған нысан санымен ғана өлшенбеуі керек. Жаңа жол бірнеше айдан кейін қайта қазылмаса, электр желісі аптап ыстықта істен шықпаса және тұрғын жұмыстың мақсатын түсінсе, жоба нақты нәтиже береді.
Бостандық ауданында енгізіліп жатқан тәсіл осы міндеттерді бір жүйеге біріктіруге бағытталған. Интерактивті карта проблемалы нүктені көрсетеді, инженерлік тексеру жұмыстың дұрыс кезектілігін белгілейді, ал ашық ақпарат әкімдік пен тұрғын арасындағы сенімді нығайтады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
