Астанада өткен жасанды интеллект бойынша IOAI 2026 халықаралық олимпиадасында Қазақстан құрамасының сегіз мүшесі де медаль иеленді. Ұлттық команда қоржынына екі алтын, екі күміс және төрт қола жүлде түссе, қазақстандық Даужан Бекетов абсолюттік рейтингте екінші орынға көтерілді, – деп жазады Ertenmedia.kz.
Халықаралық олимпиада 2-8 тамыз аралығында Астанада өтіп, әлемнің әр түкпірінен жасанды интеллект саласына қызығатын 500-ге жуық дарынды жасты жинады. Қазақстан құрамасы жарыста жоғары нәтиже көрсетіп, қатысқан сегіз оқушының барлығы жүлдегер атанды.
Олимпиададағы ең жоғары нәтижелердің бірін Даужан Бекетов көрсетті. Ол барлық қатысушы арасындағы абсолюттік рейтингте екінші орын алды. Мұндай нәтиже қазақстандық мектеп оқушыларының жасанды интеллект, алгоритм және бағдарламалау саласындағы дайындығы халықаралық деңгейде бәсекеге қабілетті екенін көрсетті.
IOAI 2026 олимпиадасының бас серіктесі Kaspi.kz болды. Компания соңғы жылдары Қазақстандағы технологиялық экожүйені, бағдарламалау мен жасанды интеллект бағытындағы жас мамандарды қолдауға басымдық беріп келеді.
Биыл Kaspi.kz толығымен қазақстандық мамандар әзірлеген Kasper жеке AI-көмекшісін таныстырды. Компания технологиялық жобалардың болашағын талантты бағдарламашылар, инженерлер мен зерттеушілердің жаңа буынымен байланыстырады. Осы мақсатта спорттық бағдарламалау, жасанды интеллект және киберқауіпсіздік жарыстарына қолдау көрсетіп, Қазақстанның Спорттық бағдарламалау федерациясымен бірлесіп жұмыс істеп келеді.
Kaspi.kz басшысы әрі негізін қалаушылардың бірі Михаил Ломтадзе технологияның негізгі құндылығы оның күрделілігімен емес, адам өміріне беретін пайдасымен өлшенуі керек екенін атап өтті.
– Технология жасағанда «Мен қандай керемет технология жасадым?» деген сұрақтан бұрын, «Ол басқа адамдардың өмірін қалай өзгертеді?» деп ойлау қажет. Технологияны технология үшін емес, адамдар үшін жасау керек. Адамның құндылықтары да өте маңызды. Жақсы мен жаманды ажыратып, технологияны өзгенің өмірін жақсартуға пайдалану қажет, – деді Михаил Ломтадзе.
Оның айтуынша, елдің болашағы білімге ұмтылған, үнемі дамып, халықаралық ортада тәжірибе жинайтын жас буынның жетістігіне тікелей байланысты.
Халықаралық олимпиададағы медаль бір күндік жарыстың нәтижесі емес. Оның артында бірнеше айлық дайындық, оқу-жаттығу жиындары, жаттықтырушылардың жұмысы және халықаралық жарыстарда жиналған тәжірибе жатыр. Жасанды интеллект олимпиадасында алгоритмдік ойлау, математикалық дайындық, бағдарламалау және күрделі деректермен жұмыс істеу қабілеті қатар сыналады.
Қазақстанның Спорттық бағдарламалау федерациясының президенті Бағдат Мусин технологиялық компаниялардың білім мен таланттарды дамытуға қатысуын тұтас индустрияға салынған инвестиция деп бағалады.
– Kaspi секілді технологиялық компаниялар енді өз платформасын дамытумен ғана шектелмейді. Нарықты, тұтас индустрияны алға жылжыту қажет. Бизнестің мұндай жарыстарға қолдау көрсетуі – қоғам алдындағы жауапкершілік. Соның арқасында жаңа стартаптар, идеялар және технологиялық командалар пайда болады, – деді Бағдат Мусин.
Оның пікірінше, қазақстандық оқушылардың халықаралық додадағы жетістігі елдегі технологиялық ортаның біртіндеп күшейіп келе жатқанын көрсетеді. Бүгін олимпиадада есеп шығарып жүрген жасөспірім ертең жаңа бағдарламалық өнім, стартап немесе ғылыми зерттеу жасауы ықтимал.
IOAI 2026 жарыс алаңымен ғана шектелмеді. Олимпиада түрлі мемлекеттен келген оқушыларды, ғалымдарды, әзірлеушілер мен сарапшыларды бір ортаға жинады. Қатысушылар жасанды интеллект саласындағы жаңа зерттеулерді талқылап, тәжірибе және идея алмасып, кәсіби байланыс орнатты.
Жас қазақстандықтар үшін мұндай орта халықаралық технологиялық қауымдастықпен ерте танысуға мүмкіндік береді. Олар тек медаль үшін емес, болашақта бірге зерттеу жүргізетін, өнім әзірлейтін немесе жаһандық жобаларға қатысатын құрдастарымен байланыс орнатады.
Қазақстан құрамасының сегіз мүшесінің де жүлдеге ие болуы елдегі жасанды интеллект пен бағдарламалау мектебінің әлеуетін көрсетті. Екі алтын, екі күміс және төрт қола медаль – бір олимпиаданың қорытындысы ғана емес, технологиялық экономикаға қажет жаңа буынның қалыптасып келе жатқанының белгісі.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
