АҚШ-тың Федералдық авиация әкімшілігі (FAA) ел бойынша барлық әуе рейстерінің ұшуын бірнеше сағатқа жаппай тоқтатып, соңғы жиырма бес жылда болмаған көлік дағдарысы тіркелді, деп хабарлайды Ertenmedia.kz.
Әуе айлақтарындағы тоқырау салдарынан мыңдаған рейс шегеріліп, миллионнан астам жолаушы межелі жеріне жете алмай қалды. Төтенше шешім қабылданған уақытта әуеде болған 3500-ден астам ұшақ арнайы қауіпсіздік ережелеріне сәйкес жерге қондырылды. Сонымен қатар 800-ден аса әуе кемесі шұғыл түрде бағытын өзгертуге немесе ұшып шыққан әуежайына қайта оралуға мәжбүр болған.
Дағдарыстың түпкі себебі: байланыс желісін жаңарту кезіндегі қателік
Көлік министрі Шон Даффи мен Ішкі қауіпсіздік министрі Маркуэйн Маллин Ақ үйде бірлескен брифинг өткізіп, оқыс оқиғаның мән-жайын баяндады. Мәлімет бойынша, ақау жеке мердігер компанияның шалғай нысандағы ескі мыс байланыс сымдарын жаңа талшықты-оптикалық кабельдерге ауыстыру барысында туындаған. Жаңа құрылғылар өткен ғасырдан қалған аналогты құралдармен дұрыс байланыса алмаған.
Шон Даффи жаңа техника ескірген коммутаторлар мен маршрутизаторларға шамадан тыс жүктеме түсіргенін түсіндірді.
«Бізде өте ескі әуе қозғалысын басқару инфрақұрылымы жұмыс істеп тұр. Жаңа желіні қосқан кезде жүйе әр 4-5 секунд сайын мыңнан астам байланыс орнатуға тырысып, шамадан тыс жүктелді. Осының кесірінен ұшақтармен байланыс пен радар деректерінде үзілістер пайда болды. Жолаушылар қауіпсіздігі басты орында тұрғандықтан, әуе кеңістігін толық жабуға тура келді», – деді ол.
Ресми органдар оқиғаның артында ешқандай кибершабуыл немесе қаскүнемдік әрекет жоқ екенін, жасанды интеллектінің де бұған қатысы табылмай, мәселе таза техникалық сипатта болғанын айтты.
Қалпына келтіру жұмыстары және Конгреске қойылған талап
Федералдық авиация басқармасы бірнеше сағаттан соң ұшуға салынған тыйымды алып тастағанымен, әуе тасымалының қалыпты ырғағын қалпына келтіру бірнеше күнге созылмақ. Ұшақтар мен экипаж құрамдарының бекітілген орындарынан ауысып кетуіне байланысты ірі авиакомпаниялар әлі күнге дейін кідірістерді реттеп жатыр.
Федералдық басқарма басшысы Брайан Бедфорд жолаушылардан ресми түрде кешірім сұрап, кестенің толық тұрақталуы үшін барынша күш салынып жатқанын жеткізді. Осы оқиғадан кейін президент Трамптың командасы заң шығарушы органды сынға алып, елдің әуе инфрақұрылымын түбегейлі жаңғырту мәселесін қайта көтерді.
Ішкі қауіпсіздік министрі Маркуэйн Маллин саланы жартылай жөндеумен алдауқатар етудің қауіпті екенін ескертті.
«Жаңа жабдықтар мен заманауи технологиялар ескірген жүйеге ауырлық салды. Жамау-жасқау әдісі бұдан былай нәтиже бермейді, бізге түбегейлі жаңа кешен қажет», – деп мәлімдеді министр.
АҚШ Конгресі бұған дейін байланыс желілерін қалпына келтіру үшін 12,5 миллиард доллар бекіткен еді. Алайда Ақ үй елдің әуе қозғалысын басқару желісін толық цифрландыру және жаңарту мақсатында қосымша 30,1 миллиард доллар сұрап отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
