«Таза Қазақстан» бастамасы биыл ел бойынша 6,1 миллионға жуық адамды біріктіріп, аумақтарды тазалау, көгалдандыру және заңсыз қоқыс орындарын жою бағытында ауқымды жұмыс атқарды. Жыл басынан бері 117 мың гектарға жуық жер тазартылып, 813 мың тоннадан астам қалдық жиналды, – деп жазады Ertenmedia.kz.
Биыл «Таза Қазақстан» аясында республика бойынша 500 экологиялық іс-шара ұйымдастырылған. Оған қатысқан 6,1 миллион азаматтың 741 мыңы ерікті ретінде тазалық жұмысына атсалысты.
Акциялар барысында шамамен 117 мың гектар аумақ қоқыстан тазартылды. Жиналған қалдық көлемі 813 мың тоннадан асты. Елді мекендерді көгалдандыру жұмысы шеңберінде 1,2 миллионға жуық ағаш отырғызылды.
Экологиялық бақылауда ғарыштық мониторинг технологиясы да кеңінен пайдаланылып келеді. Мұндай жүйе елді мекендерден шалғай орналасқан аумақтағы заңсыз қоқыс орындарын анықтауға мүмкіндік береді.
2026 жылы ғарыштық мониторинг көмегімен 2 642 заңсыз қоқыс орны анықталған. Қазір оның 2 035-і, яғни 77 пайызы жойылды. Қалған аумақта тазарту жұмысы жалғасып жатыр.
Ұзақмерзімді статистика да заңсыз қоқыс орындарының азайып келе жатқанын көрсетеді. 2018 жылы ел бойынша 8,6 мыңнан астам рұқсатсыз қоқыс орны тіркелсе, қазір олардың саны үш еседен астам қысқарған.
«Таза Қазақстанның» тағы бір бағыты азаматтардың қоршаған ортаны жақсартуға тікелей қатысуына мүмкіндік беретін цифрлық сервистермен байланысты. Соның бірі – @TazaQazBot платформасы.
Биыл чат-бот арқылы 18 мыңнан астам өтініш түскен. Оның 16 мыңнан астамы орындалды.
Өтініштер 21 санатты қамтиды. Азаматтар аумақты тазалау, қоқыс шығару, көгалдандыру, көшені абаттандыру, жарықтандыру және жол жөндеу мәселелері бойынша өтініш қалдыра алады.
Қазір сервис eGov Mobile қосымшасы арқылы да қолжетімді. Республика бойынша цифрлық жүйе көмегімен өңделген өтініштердің жалпы саны 50 мыңнан асты.
«Таза Қазақстан» бір реттік сенбілік форматынан біртіндеп тұрақты экологиялық жүйеге ауысып келеді. Мұнда азаматтардың белсенділігі, әкімдіктер мен мемлекеттік органдардың жұмысы, ғарыштық мониторинг және цифрлық кері байланыс құралдары бір арнаға тоғыстырылған.
Миллиондаған қатысушы, жүздеген мың тонна жиналған қалдық, жойылған мыңдаған заңсыз қоқыс орны және отырғызылған 1,2 миллионға жуық ағаш бастаманың нақты нәтижесін көрсетеді.
Негізгі міндет енді тазалық акцияларын науқандық шара ретінде қалдырмай, қоршаған ортаға жауапкершілікпен қарауды күнделікті мәдениетке айналдыруға тіреледі. Өйткені таза әрі жайлы орта үлкен жобалардан ғана емес, әр адамның қарапайым әрекетінен қалыптасады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
