20 тамызда Шымкент қаласында «Әділет TV» республикалық телеарнасының ашылу салтанаты өтіп, оған «Ақ жол» Демократиялық партиясының төрағасы Дания Еспаева қатысты. Іс-шарада жаңа медиажобаның қоғамдағы орны мен кәсіби журналистиканы дамытуға қосар үлесі сөз болды, – деп жазады Ertenmedia.kz.
Салтанатты шараға «Ақ жол» партиясының өкілдері Қазыбек Иса мен Исламбек Төлебаев, сондай-ақ телеарнаның шығармашылық және техникалық ұжымы қатысты. Қонақтар жаңа арнаның жұмысымен танысып, редакция мүшелеріне алдағы қызметіне сәттілік тіледі.
Кездесуде бұқаралық ақпарат құралдарының қазіргі қоғамдағы орнына ерекше назар аударылды. Партия өкілдерінің пікірінше, кәсіби медиа қоғамдық пікірді қалыптастырумен ғана шектелмей, азаматтар мен мемлекеттік институттар арасындағы тұрақты байланысты қамтамасыз ететін маңызды алаңға айналуға тиіс.
Дания Еспаева ашық ақпараттық орта қоғамның сапалы дамуы үшін аса қажет екенін атап өтті. Оның айтуынша, журналистика азаматтардың нақты мәселесін көтеретін, түрлі көзқарастың еркін айтылуына мүмкіндік беретін және қоғамдық дискуссияны мазмұнды арнаға бағыттайтын құрал болуы керек.
Сайлауалды науқан аясында жиын қатысушыларына «Ақ жол» Демократиялық партиясының саяси бағдарламасының негізгі бағыттары да таныстырылды. Партия өкілдері отандық кәсіпкерлікті қолдау, экономикалық белсенді орта тапты қалыптастыру, азаматтардың құқықтары мен заңды мүдделерін қорғау, сондай-ақ парламенттік бақылауды күшейту мәселелеріне тоқталды.
Дания Еспаеваның айтуынша, ел экономикасының тұрақтылығы үшін кәсіпкерліктің еркін дамуы мен жеке бастамаларға қолайлы орта қалыптастыру шешуші мәнге ие. Партия өз бағдарламасында шағын және орта бизнестің әкімшілік кедергілерін азайту, қаржыға қолжетімділікті кеңейту және кәсіпкерлердің құқықтарын қорғау тетіктерін күшейтуді маңызды міндет ретінде қарастырады.
Медиажобалар қоғамдағы пікір алуандығын кеңейтеді
Жиында қуатты орта тап қалыптастыру мәселесі де сөз болды. «Ақ жол» өкілдерінің пікірінше, табысы тұрақты, экономикалық тұрғыдан дербес және құқықтық мәдениеті жоғары азаматтар үлесінің өсуі елдің саяси және әлеуметтік тұрақтылығына тікелей әсер етеді.
Партия өкілдері парламенттік бақылау институтын күшейтуді де өзекті бағыттардың бірі ретінде атады. Олардың пайымынша, заң шығарушы орган қабылданған шешімдердің орындалуын қадағалап, мемлекеттік органдардың қоғам алдындағы есептілігін арттыруға белсенді қатысуы қажет.
Телеарна ұжымымен әңгіме барысында медиа саласындағы кәсіби стандарт, ақпараттың нақтылығы және қоғамдық мүддені басшылыққа алу мәселесі де көтерілді. Дания Еспаева журналистиканың сенім капиталы ең алдымен объективтілік, дерекке жауапкершілік және түрлі пікірге орын беру арқылы қалыптасатынын атап өтті.
Оның айтуынша, жаңа телеарна азаматтардың талап-тілегі, кәсіпкерлердің мәселесі, өңірлік даму, әлеуметтік саясат және қоғамдық өзгерістер секілді маңызды тақырыптарды ашық көтеретін алаңға айнала алады. Мұндай медиажобалар қоғамдағы пікір алуандығын кеңейтіп, маңызды мәселелерді жан-жақты талқылауға мүмкіндік береді.
«Ақ жол» өкілдері «Әділет TV» ұжымына кәсіби табыс тілеп, қоғамдық маңызы бар тақырыптарды объективті әрі сапалы жариялауға шақырды. Сонымен бірге телеарнаның жаңа жобалары көрермен сеніміне ие болып, ақпараттық кеңістіктегі бәсекені күшейтеді деген үміт білдірілді.
Шымкенттегі жаңа телеарнаның ашылуы сайлауалды науқан кезеңіндегі саяси кездесумен ғана шектелмей, медиа мен қоғам арасындағы байланыстың жаңа алаңын таныстырған оқиғаға айналды. Ал алдағы уақытта «Әділет TV»-дің қоғамдық сұранысқа қаншалықты жауап беріп, кәсіби журналистиканың сапалы үлгісін қалыптастыра алатынын оның күнделікті жұмысы көрсетпек.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
