Алматыда ғылыми әзірлемелерді қала экономикасына енгізуге бағытталған грант байқауының екінші кезеңі аяқталды. Конкурс комиссиясы 191 жобаның арасынан практикалық және коммерциялық әлеуеті жоғары 70 жұмысты іріктеді, – деп жазады Ertenmedia.kz.
Қалада Мемлекет басшысының ғылымды дамыту, ғылыми зерттеуді қолдау және оның нәтижесін экономикаға енгізу жөніндегі тапсырмасы жүзеге асырылып жатыр. Осы мақсатта 2024 жылы Алматы әкімдігі жанынан Ғылым және технологиялар кеңесі құрылды. Кеңес ғалымдар мен қала билігінің байланысын күшейтіп, пайдалы әзірлемелерді нақты секторға бағыттауға тиіс.
Ғылым күніне орай жарияланған грант байқауына өтінім қабылдау 10 сәуірден 10 мамырға дейін жүргізілді. Ұйымдастырушыларға барлығы 229 ғылыми жоба ұсынылды. Алдын ала іріктеуден кейін 191 жұмыс келесі кезеңге өтіп, 38 жобадан қайталану белгілері анықталды.
Іріктеуден өткен ғалымдарға 20 шілде мен 21 тамыз аралығында бес апталық акселерация бағдарламасы ұйымдастырылды. Қатысушылар жобаларын жетілдіріп, ғылыми идеяның қала өміріндегі практикалық маңызын айқындады. Оларға әзірлеменің коммерциялық мүмкіндігін бағалау және конкурс комиссиясы алдында қорғау бойынша кеңес берілді.
Акселерация қорытындысында комиссия 70 үздік жобаны үшінші кезеңге өткізді. Бағалау кезінде ғылыми жаңашылдық, практикалық пайда және әзірлемені өндіріске енгізу мүмкіндігі ескерілді. Яғни байқауда тек қызықты идеяға емес, оның қалаға беретін нақты нәтижесіне басымдық жасалды.
Комиссия құрамына Алматы мәслихатының депутаттары мен Ғылым және технологиялар кеңесінің мүшелері кірді. Жобаларды Ұлттық ғылым академиясының, ғылыми қоғамдастықтың және жұртшылықтың өкілдері де бағалады. Әртүрлі сала мамандарының қатысуы ұсынылған әзірлемелерді бірнеше қырынан саралауға мүмкіндік береді.
Келесі кезеңде жобалар арнайы комиссия алдында қорғалып, сараптамалық бағалаудан өтеді. Республика күніне орай 20 үздік жоба анықталып, жеңімпаздарға ғылыми грант есебінен қаржы беріледі. Қаражат зерттеуді қағаз жүзінде қалдырмай, қаланың өзекті мәселелерін шешуге және отандық әзірлемелерді нақты секторға енгізуге бағытталады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
