Президент Қасым-Жомарт Тоқаевтың Германияға ресми сапарының екінші күні Siemens AG компаниясының коммерциялық және қаржылық мәселелер жөніндегі вице-президенті Бернд Ульбрихтпен кездесуден басталды, деп хабарлайды Ertenmedia.kz.
Келіссөздер барысында жаһандық деңгейдегі неміс өнеркәсіп алыбы мен Қазақстан арасындағы ынтымақтастықтың бүгінгі жай-күйі мен болашақ инвестициялық бағыттары талқыланды. Мемлекет басшысы Siemens компаниясының Қазақстан үшін сенімді әрі стратегиялық серіктес екенін атап өтті. Корпорацияның негізгі бағыттары – өнеркәсіпті цифрландыру, электрлендіру, көлік мобильділігі және интеллектуалдық инфрақұрылым құру – еліміздің ұлттық экономикасын жаңғыртудың басым бағыттарымен толық үндеседі.
Qarmet комбинатын жаңғырту және нақты сектордағы цифрландыру
Президент кездесуде нақты секторды цифрлық трансформациялау бойынша елімізде жүргізіліп жатқан жүйелі реформалар туралы баяндады. Осы орайда Қазақстан басшысы Siemens пен отандық Silk Road Electronics компаниясының өзара бірлескен жобасын ерекше атап өтті.
Аталған серіктестік шеңберінде Теміртаудағы Qarmet металлургия комбинатының жабдықтарын заманауи талаптарға сай түбегейлі жаңғырту көзделген. Ауыр өнеркәсіп ошағын автоматтандыру мен жаңа технологиялармен жарақтандыру өндіріс қауіпсіздігін арттырып қана қоймай, өнімнің өзіндік құнын төмендетуге және қоршаған ортаға келетін экологиялық салмақты азайтуға мүмкіндік береді.
Сатып алудан өз өндірісімізді құруға дейін
Мемлекет басшысы Қазақстанның шетелдік алпауыттармен әріптестік орнатудағы негізгі саясатын нақтылады. Ресми Астана бұрынғыдай жай ғана дайын технологияны сатып алушы рөлінен арылып, озық ноу-хауды ел ішінде игеруге басымдық беріп отыр.
Президент неміс корпорациясымен ынтымақтастықты тереңдетудің басты талабы ел ішінде жаңа өндірістік тізбектерді құру екенін қадап айтты.
«Қазақстан тек озық жабдықтарды сатып алуға ғана емес, сонымен бірге өндірістік, инженерлік және сервистік қуаттарды ел ішінде қалыптастыруға мүдделі», – деп атап өтті Президент Тоқаев.
Осыған байланысты неміс концернінің тәжірибесі мен технологиялық инновациялары еліміздің энергетикасы мен коммуналдық инфрақұрылымын жаңартуға, сондай-ақ қоршаған ортаның ахуалын бақылайтын мониторинг жүйелерін жетілдіруге тартылуы мүмкін. Бұған қоса, медициналық технологиялар бойынша әлемдік көшбасшы саналатын Siemens Healthineers компаниясымен байланысты кеңейтудің орасан әлеуеті бар екені айтылды.
Неміс тарапының ұсынысы: Дата-орталықтар және сумен қамту
Siemens AG вице-президенті Бернд Ульбрихт корпорацияның бастамаларына үнемі қолдау көрсетіп келе жатқаны үшін Қазақстан басшысына алғыс білдірді. Оның мәліметінше, отандық нарықта 30 жыл бойы үздіксіз жұмыс істеп келе жатқан неміс алыбы осы уақыт ішінде бірнеше ауқымды өнеркәсіптік жобаны сәтті жүзеге асырған.
Бернд Ульбрихт компанияның еліміздің инфрақұрылымын жаңғыртуға жаңа шешімдер ұсынуға дайын екенін растады.
«Компания электр желілерін жаңғырту, цифрландыру, автоматтандыру және сумен жабдықтау салаларында озық шешімдер ұсынуға қауқарлы, сондай-ақ деректерді өңдеу орталығының инфрақұрылымын бірлесе қалыптастыруға дайын», – деді Бернд Ульбрихт.
Қазақстан өңірлік цифрлық және жасанды интеллект хабына айналуды мақсат етіп отырған шақта, деректерді өңдеу орталықтарының (ЦОД) инфрақұрылымын қалыптастыруға Siemens секілді алыптардың қатысуы еліміздің цифрлық егемендігін нығайта түспек. Келіссөздер нәтижесі Қазақстан мен Германия арасындағы өнеркәсіптік кооперацияның жаңа технологиялық деңгейге көтерілгенін аңғартады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
