Астана жекелеген цифрлық жобаларды енгізу кезеңінен қаланы біртұтас технологиялық жүйе арқылы басқаруға көшіп жатыр. Цифрландыру жұмысы «Қауіпсіз қала», «Ашық қала» және «Ақылды қала» бағыттары бойынша жүргізілуде, – деп жазады Ertenmedia.kz.
Негізгі жобалардың бірі саналатын Astana Smart City қалалық инфрақұрылымнан жиналған ақпаратты бір ортаға біріктіреді. Оның құрамына Деректерді өңдеу орталығы мен Қалалық ахуалдық орталық кіреді. Қос нысан коммуналдық, көлік, қауіпсіздік және жедел қызметтердің жұмысын үйлестіруге мүмкіндік береді.
Деректерді өңдеу орталығы бейнеағындарды, қалалық мәліметтерді және жасанды интеллект көмегімен жасалған талдау нәтижелерін орталықтандырылған түрде сақтайды. Инфрақұрылым халықаралық TIER III сенімділік стандартына және ақпараттық қауіпсіздік жөніндегі ұлттық талаптарға сәйкес құрылған. Осы база қалалық жүйелердің үздіксіз жұмыс істеуіне жағдай жасайды.
Қалалық ахуалдық орталыққа 60 мыңнан астам камера және 18-ден астам қалалық қызмет қосылған. Жасанды интеллект түтін, өрт, төбелес, адам көп жиналған орын және басқа да төтенше жағдайларды анықтайтын 35 сценарий бойынша жұмыс істейді. Оқиға туралы мәліметті тиісті қызметке жеткізу уақыты 10 минуттан нақты уақыт режиміне дейін қысқарған.
Жасанды интеллект қауіпсіздіктің жаңа құралына айналды
Елордада 1 200-ден астам аппараттық-бағдарламалық кешен жол ережесін бұзудың 15 түрін автоматты түрде тіркейді. 2026 жылдың алғашқы жартысында бірыңғай жүйе арқылы 2,5 мыңнан астам оқиға өңделген. Мұндай бақылау жолдағы және қоғамдық кеңістіктегі жағдайға жедел әрекет етуге көмектеседі.
2022-2025 жылдары Астанадағы 860 нысанға 4 430 бейнекамера орнатылған. Биыл тағы 240 нысанды 1 200 камерамен қамту жоспарланып, соның 1 142-сі іске қосылды. Бейнебақылауды кеңейту аулалар, саябақтар және халық көп жиналатын орындардың қауіпсіздігін күшейтеді.
Балаларды қорғауға арналған жобаның екінші кезеңі 100 мемлекеттік мектепті қамтыды. Оқу орындарына шамамен 2 мың камера мен 100 SOS дабыл түймесі орнатылып, бірыңғай жүйеге 10 мыңнан астам мектеп камерасы қосылды. Қауіпті жағдай туындаған кезде мектеп әкімшілігі мен жедел қызметтер ақпаратты жылдам алады.
Осындай кешенді қауіпсіздік жүйесі мемлекеттік балабақшаларға да енгізіледі. Алғашқы кезеңде 1 700 камера, 100 дабыл түймесі және 100 бейнедомофон орнату көзделген. Қолданыстағы 4 мың камераны ортақ платформаға біріктіру де жоспарға енгізілген.
Қалалық қызметтер бір цифрлық терезеге көшті
«Ашық қала» бағыты тұрғындардың мемлекеттік және коммуналдық қызметтерді жылдам алуына арналған. Бірінші жартыжылдықта iKomek 109 орталығы 1,1 миллионнан астам өтініш қабылдап, соның 83 пайызын алғашқы қоңырау кезінде шешкен. Birge платформасында 20 мыңнан астам адам тіркеліп, 30 мыңға жуық өтінім өңделді.
Елорданың Astana.kz бірыңғай цифрлық порталында 115-тен астам қалалық және коммуналдық қызмет қолжетімді. Платформада 14 мыңнан астам пайдаланушы тіркеліп, берілген өтініш саны 15 мыңнан асқан. QalaQyzmet сервисін біріктіру нәтижесінде онлайн арналар мен фронт-офистер арқылы 103 мыңнан астам өтінім қаралды.
Astana.kz платформасында AI-ассистент, Super App, «Инватакси» және «Менің кітапханам» сервистері дамытылып жатыр. Денсаулық сақтау саласында Cerebra AI жүйесі компьютерлік томография кескіндері арқылы инсультті анықтау уақытын бес минутқа дейін қысқартты. Үш инсульт орталығында жұмыс істейтін жүйе алғашқы жартыжылдықта 5,7 мыңнан астам зерттеуді өңдеді.
Әскери қызметке шақырылатын азаматтарды медициналық куәландыру рәсімі де толық цифрландырылды. Жарты жылда жаңа жүйе арқылы 7,4 мыңнан астам адам өтіп, медициналық ахуал орталығына 29 ұйымның 220-дан астам көрсеткіші біріктірілді. Мұндай тәсіл дәрігерлерге деректі жедел саралап, шешім қабылдау уақытын қысқартуға мүмкіндік береді.
Инновация тұрғындардың күнделікті өміріне енеді
Астанада 5G байланысының 423 базалық станциясы жұмыс істеп тұр. Жыл соңына дейін тағы 74 станция іске қосылып, байланысы әлсіз деп танылған 22 аумақтың қалған бөлігіндегі мәселені шешу жоспарланған. Қазір осындай 12 аймақта байланыс сапасы жақсартылды.
«Ақылды қала» бағыты аясында AI Lab инновациялық экожүйесі қалыптасып келеді. Оның ғылыми-зерттеу контурында 11 стартап пен технологиялық жоба сүйемелденіп, Astana Innovations Accelerator бағдарламасының үшінші легіне 300-ден астам өтінім түсті. Іріктеу нәтижесінде қалалық мәселелерге технологиялық шешім ұсынған 29 стартап қабылданды.
Әлеуметтік маңызы жоғары бастамалардың бірі «Шарапат» орталығында сынақтан өтіп жатқан Úmit жобасы болды. Интеллектуалды капа қимыл-қозғалысы шектеулі адамға қолын пайдаланбай-ақ смартфонды, компьютерді немесе электрлі мүгедектер арбасын басқаруға мүмкіндік береді. Жоба цифрландырудың адам өмірін жеңілдететін нақты құралға айнала алатынын көрсетеді.
Цифрлық трансформацияның нәтижесі орнатылған камера немесе іске қосылған портал санымен ғана өлшенбейді. Берік Ахметовтің айтуынша, технология қауіпсіздікті күшейтіп, қызмет алуды жеңілдетіп, қалалық процестердің тиімділігін арттыруға тиіс. Астана енді цифрлық шешімдерді бөлек қолданудан оларды қаланы басқарудың бірыңғай жүйесіне біріктіру кезеңіне өтті.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
