Каспий теңізіндегі қайғылы оқу-жаттығудан кейін Әскери-теңіз күштерінің бұрынғы бас қолбасшысы Қанат Ниязбеков ұсталып, сот санкциясымен қамауға алынды, деп хабарлайды Ertenmedia.kz.
Ішкі істер министрлігінің әскери-тергеу бөлінісі 14 сарбаздың өмірін қиған оқиға бойынша қылмыстық іс аясында бұрынғы қолбасшыны уақытша ұстау изоляторына қамады. 1-дәрежелі капитанға қызметтік міндетіне салғырт қарады деген айып тағылды.
ІІМ ресми мәлімдемесі және сот санкциясы
Құқық қорғау органдары теңіздегі оқыс оқиға кезінде басшылық тарапынан жіберілген кемшіліктер мен қауіпсіздік талаптарының сақталуын жіті тексерді.
Тергеу барысында бұрынғы бас қолбасшының жауапкершілігі қаралып, оған қатысты бұлтартпау шарасы таңдалды.
«ІІМ әскери-тергеу бөлінісі Каспий теңізіндегі оқу-жаттығу кезінде әскери қызметшілердің қаза болу фактісі бойынша қозғалған қылмыстық іс аясында қызметіне салғырт қарағаны үшін Қарулы күштер Әскери-теңіз күштерінің бұрынғы бас қолбасшысы, 1-дәрежелі капитанды ұстап, уақытша ұстау изоляторына қамады. Соттың санкциясымен ол қамауға алынды», – деп хабарлады ведомствоның баспасөз қызметі.
Қазіргі таңда іс бойынша сотқа дейінгі тергеп-тексеру амалдары жалғасуда.
Каспийдегі қасірет және лауазымды тұлғалардың ұсталуы
24 қыркүйек күні Маңғыстау облысында өткен жаттығу барысында ауа райының күрт нашарлауы салдарынан 17 сарбазды теңіз толқыны алып кеткен еді. Оқыс жағдайда 14 әскери қызметші қаза тауып, тек үш жауынгер аман құтқарылды.
Қайғылы оқиғадан кейін Президент Тоқаевтың өкімімен Қанат Ниязбеков Әскери-теңіз күштерінің бас қолбасшысы қызметінен босатылған болатын. Бұған дейін осы іс бойынша Әскери-теңіз күштері штабының бастығын, әскери бөлімдер мен катер командирлерін қоса алғанда бес лауазымды офицер қамауға алынған еді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
