Мәжілістің бұрынғы төрағасы Нұрлан Нығматулин ұзақ уақыттан бері алғаш рет көпшілік алдына шықты. 2022 жылдың басында қызметінен кеткелі бері ел көзіне түспей жүрген экс-спикер Алматыда өткен Қазақстанның халық әртісі, белгілі актер әрі кинорежиссер Досхан Жолжақсыновтың 75 жылдық мерейтойында төбе көрсетті, деп хабарлайды Ertenmedia.kz.
Қаңтар оқиғасынан кейінгі алғашқы көрініс
Нұрлан Нығматулин 2022 жылғы Қаңтар оқиғасынан кейін Мәжіліс төрағалығынан өз еркімен кеткеннен бері саяси және қоғамдық сахнадан мүлдем көрінбей кеткен еді. Оның шетелге кеткені немесе елде оқшау өмір сүріп жатқаны туралы түрлі сыбыстар айтылғанымен, соңғы жылдары ол туралы ресми де, бейресми де ақпарат жоқтың қасы болатын.
Алматыдағы салтанатты кештен түсірілген бейнежазбалар әлеуметтік желілерде лезде тарап, қолданушылар арасында қызу талқыланды. Кадрлардан сахна саңлағын құттықтауға келген экс-спикердің ақжарқын көңіл-күймен қонақтармен әңгімелесіп жүргенін байқауға болады.
Мерейтойда бас қосқан белгілі тұлғалар
Қазақ киносы мен театрының ардагері Досхан Жолжақсыновтың 75 жасқа толуына орай ұйымдастырылған мерейтойлық кешке еліміздің бірқатар бұрынғы және қазіргі саяси, мәдени элита өкілдері қатысты.
Меймандардың қатарында:
Мемлекет қайраткері Иманғали Тасмағамбетов;
Бұрынғы Мемлекеттік хатшы Қырымбек Көшербаев;
Белгілі қоғам қайраткері Қуаныш Сұлтанов;
Алматы облысының экс-әкімі Амандық Баталов және өзге де танымал тұлғалар болды.
Қоғам назарын аударған басқосу
Өнер тарланының мерейтойы тек мәдени кеш қана емес, бір кездері мемлекеттік басқару жүйесінің тізгінін ұстаған белді шенеуніктер мен саясаткерлердің бас қосу алаңына айналды.
Әлеуметтік желі қолданушылары көптен бері тасада жүрген саяси тұлғалардың, әсіресе Нұрлан Нығматулиннің ортаға қайта шығуын түрліше бағалап жатыр. Қалай болғанда да, салтанатты жиын тарихи тұлғалардың жеке байланыстары мен ортақ сыйластығының әлі де сақталғанын көрсеткендей болды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
