Қазақстанда көлік-логистика инфрақұрылымын ауқымды дамыту аясында 2030 жылға дейін тағы 21 жаңа логистикалық орталық бой көтереді, деп хабарлайды Ertenmedia.kz.
Терминалдар желісі мен шетелдік жобалар
Қазіргі уақытта елімізде 46 осындай кәсіпорын жұмыс істеп тұр. Үкімет отырысында баяндама жасаған көлік вице-министрі Талғат Ластаев транзиттік әлеуетті арттыру үшін ішкі қуатты ғана емес, сыртқы халықаралық байланыстарды да нығайту шаралары жүріп жатқанын атап өтті.
«Қазір ел аумағында 46 логистикалық орталық бар, 2030 жылға дейін тағы 21 орталық бой көтереді. Сонымен қатар көлік дәліздерін транзиттік жүкпен қамтамасыз ету үшін серіктес мемлекеттердің аумағында сыртқы терминалдар желісі дамытылып жатыр», – деді Талғат Ластаев.
Бүгінде Қытайдың Ляньюньган және Сиань қалаларында, сондай-ақ Грузияның Поти портында отандық үш терминал қызмет көрсетуде. Бұған қоса Ресейдің Селятино, Беларусьтің Свислочь, Өзбекстанның Ташкент, Қытайдың Чэнду, Әзербайжанның Алят, Румынияның Констанца қалаларында және Венгрия аумағында тағы жеті жоба кезең-кезеңімен жүзеге асырылып жатыр.
Жол құрылысы мен өткізу бекеттері
Халықаралық және ішкі тасымал сапасын жақсарту мақсатында маңызды тасжолдар жаңартылуда. Тамыз айында басталған Арал – Каспий магистралінің құрылысын 2028 жылдың соңына дейін толық аяқтау жоспарланған. Сонымен қатар биыл «Көкшетау – Петропавл» автожолы бойынша дайындық жұмыстары жүргізіліп, негізгі құрылыс 2027 жылы басталады.
Көлік министрлігі республикалық және жергілікті маңызы бар күрежолдардың сапасына бірыңғай стандарт енгізіп, жұмысты жобалау сатысынан бастап пайдалануға берілгенге дейін қатаң бақылайды. Шекаралық өткізу қабілетін арттыру үшін 2027 жылдың соңына дейін 37 автомобиль өткізу пункті толық жаңғыртылмақ.
Әуе хабтары мен цифрлық платформа
Алдағы үш жыл көлемінде еліміздегі әуежайлардың инфрақұрылымы, оның ішінде ұшу-қону жолақтары мен терминалдар кешенді жаңартудан өтеді. Негізгі әуе хабтарында арнайы экономикалық аймақ режимі іске қосылып, жанар-жағармай кешендері мен заманауи жүк қоймалары кеңейтіледі.
Отандық Air Cargo жүк тасымалдаушысы әуе кемелері паркін ұлғайтуды көздеп отыр. Компания сатып алған алғашқы Airbus A340 ұшағы қараша айында, ал екіншісі келесі жылдың көктемінде жеткізіледі. Кейін жүк ұшақтарының жалпы санын онға жеткізу жоспарланған.
Тасымал процесін жеделдету және рәсімдеу мерзімін қысқарту үшін «Е-Көлік» бірыңғай зияткерлік платформасы енгізіледі. Жүйе қағазсыз құжат айналымын қамтамасыз етіп, жүк бағыттарының ашықтығын күшейтеді. Аталған инфрақұрылымдық бастамалардың барлығы Қазақстанды Еуразияның басты логистикалық орталығына айналдыру міндетіне сай жүзеге асырылып жатыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
