Швейцариялық Glencore компаниясы қазақстандық «Қазмырыштың» бақылау пакетін сату бойынша келіссөздерді жалғастырып жатыр, деп хабарлайды Ertenmedia.kz. Бұл туралы 28 қазанда Financial Times хабарлады.
Пакеттің құны 5 млрд долларға жетуі мүмкін. Басылымның мәліметінше, сату туралы түпкілікті шешім алдағы екі ай ішінде қабылданады деп күтілуде.
Әзірге тараптар арасында нақты келісім жасалған жоқ. Ықтимал үміткерлердің қатарында Integra Construction KZ-мен байланысы бар қазақстандық кәсіпкер Шахмұрат Мүтәліптің есімі аталады. Бұған дейін KazZinc Group Ltd. және Central Asia Resources Holding Ltd. компанияларының тіркелгені туралы ақпарат тараған болатын.
Glencore-дің өзге де мәмілелері
Халықаралық трейдер басқа да активтерін оңтайландыруды қарастырып отыр:
- Конго ДР – компания мыс-кобальт активтеріндегі 40% үлесін Orion CMC тобына сату мүмкіндігін қарастыруда. Активтердің алдын ала құны қарызды есепке алғанда шамамен 9 млрд долларды құрайды.
- Чили – Glencore суды тұщытумен байланысты инфрақұрылымдық жоба арқылы Collahuasi мыс кенішін кеңейтуді қаржыландыру тетіктерін пысықтап жатыр.
- Bunge Global – компания келешекте өзіне тиесілі 16% акцияны сатуға ниетті. Бас директор Гэри Нэглдің айтуынша, Glencore бес жылдан кейін бұл активтен толық шығуды көздейді.
Glencore 2026 жылдың қорытындысы бойынша сауда пайдасы 5 млрд доллардан асады деп болжап отыр. Активтерді сату капиталды босатып, акционерлерге төленетін төлемдерді арттыруға мүмкіндік береді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
