Қытай басшысы Си Цзиньпин Шэньчжэнь қаласында өткен Азия-Тынық мұхиты экономикалық ынтымақтастығы (АТЭЫ) бас директорларының саммитінде инвестициялық кедергісіз еркін әрі ашық сауданы қолдауға шақырды, деп хабарлайды Ertenmedia.kz.
Жаһандық жүйені қорғау және тұрақтылық
Қытай төрағасы халықаралық саудадағы біржақтылық пен протекционизмнің өршуіне алаңдаушылық білдірді. Оның пікірінше, күрделі геосаяси жағдай кезінде халықаралық тәртіп пен ережелерді сақтау бұрынғыдан да маңызды бола түсті.
«Біз Дүниежүзілік сауда ұйымына негізделген көпжақты сауда жүйесін берік сақтауымыз керек. Еркін әрі ашық сауда мен инвестицияларды қолдап, өндірістік және жеткізу тізбектерінің тұрақты жұмысын қамтамасыз етуге міндеттіміз», – деп мәлімдеді Си Цзиньпин.
Технологиялық текетірес пен шектеулер
Қытай басшысының бұл мәлімдемесі АҚШ пен Бейжің арасындағы жаңа технологиялық шиеленіспен тұспа-тұс келді. Вашингтон жуырда ғана Nvidia сияқты алпауыттардың озық жасанды интеллект чиптерін Қытай нарығына жеткізуіне қосымша шектеу қойды. Бейжің билігі мұндай қадамдарға қарсы жауап беретінін ескерткен болатын.
Сонымен бірге Батыс елдері Қытайды өндіріс саласына шамадан тыс қолдау көрсетіп, жыл сайын 1 триллион доллардан асатын сауда профицитіне қол жеткізіп отыр деп сынайды. АҚШ пен Еуропалық Одақ мұндай жағдай жергілікті салаларға қауіп төндіреді деп санайды. Қытай тарапы бұл даму моделін әлемдік көшбасшылармен арадағы алшақтықты азайтудың заңды жолы ретінде түсіндіреді.
Алпауыттар диалогы мен аймақ елдерінің алаңдаушылығы
Шэньчжэньдегі басқосу жаһандық саяси процестердің тоғысқан орталығына айналды. Мұнда Си Цзиньпин АҚШ президенті Дональд Трамп және Ресей президенті Владимир Путинмен маңызды келіссөздер жүргізеді. Тараптар Украина мен Иран төңірегіндегі қарулы қақтығыстарды, өзара сауда байланысын, жасанды интеллект пен ядролық қауіпсіздік мәселелерін талқылайды деп күтілуде.
Сарапшылар бұл келіссөздерді өткен ғасырдағы Ялта конференциясымен салыстырып жатыр. Соның салдарынан Еуропа мен Азияның шағын мемлекеттері державалардың жаһандық келісімдері өзге елдердің мүддесін шеттетіп тастамай ма деп алаңдаушылық білдіруде.
«Тұрақтылық қауіпсіздікті әкеледі, ал қауіпсіздік өркендеуге жол ашады. Біз сауда мен инвестициядағы кедергілерді жойып, ашық аймақтық экономика құруға тиіспіз», – деді Қытай жетекшісі.
Жасанды интеллект пен цифрлық саудаға екпін
Си Цзиньпин АТЭЫ құрамындағы 21 экономиканы қамтитын Азия-Тынық мұхиты еркін сауда аймағын (FTAAP) ілгерілету қажеттігін атап өтті. Сонымен қатар шекарааралық электронды коммерция мен цифрлық кедендік рәсімдерді жетілдіруге шақырды.
Қытай басшысы жасанды интеллект пен жаңа цифрлық модельдердің бизнеске белсенді еніп жатқанына тоқталып, технологиялық даму мен ынтымақтастықта біржақты шектеулерден бас тарту қажет екенін еске салды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!







