Шымкентте жас отбасылар арасында спорттық квест ұйымдастырылып, ата-аналар мен балалар ептілік, шапшаңдық және өзара үйлесімділік бойынша сынға түсті. Отбасылық спортты дамытуға бағытталған сайыстың іріктеу кезеңіне 30 отбасы қатысып, үздік алты команда финалға жолдама алды, деп хабарлайды Ertenmedia.kz.
Іріктеу барысында қатысушылар өз отбасын таныстырып, ізгілікке үндейтін тапсырмаларды орындады және шығармашылық бейнеролик әзірледі. Ұйымдастырушылар тапсырмалардың мазмұнына отбасы мүшелерінің бір-біріне деген сенімін, жауапкершілігін және ортақ іске жұмылу қабілетін арқау еткен.
Финалдық кезең Шымкент дендросаябағында өтті. Байқау шарты бойынша әр ата-ананың жасы 35-тен аспауы керек. Команда құрамына ерлі-зайыпты мен екі бала кірді. Қатысушылар саябақтың әр тұсына жасырылған тапсырмаларды тауып, жұмбақ шешіп, пазл құрастырды.
Мұндай сайыс дене белсенділігін арттырумен қатар, отбасы мүшелерінің бір команда ретінде әрекет етуіне мүмкіндік береді. Ата-ана мен бала бірлесе шешім қабылдап, уақытты тиімді пайдалануға және қиындықты өзара қолдау арқылы еңсеруге үйренеді. Спорт осылайша отбасының күнделікті өміріне еніп, салауатты әдет қалыптастырудың тиімді құралына айналады.
Шымкент қаласының жастар саясаты мәселелері басқармасының басшысы Әкімжан Әбдәкімов квестің басты мақсаты жас жұбайлар арасындағы сенім мен түсіністікті нығайту екенін айтты.
– Отбасыларды спортқа және белсенді өмір салтына баулу маңызды. Ортақ тапсырманы бірге орындау ерлі-зайыптының ғана емес, ата-ана мен баланың да қарым-қатынасын жақсартады, – деді ол.
Байқауға қатысқан Нұрислам Жайлымысов спорттық ойынның жас отбасыларға жақсы көңіл күй сыйлағанын жеткізді. Оның айтуынша, отбасы мүшелері сайыс кезінде бір-бірін жаңа қырынан танып, ерекше әсер алған.
Қорытынды іс-шараға финалистермен бірге жобаны қолдаған өзге отбасылар да қатысты. Қонақтарға музыкалық нөмірлер мен сахналық қойылымдар ұсынылды. Квест соңында жеңімпаздар мен белсенді отбасылар арнайы марапатқа ие болды.
Отбасылық спортты дамыту қоғам денсаулығын нығайтудың маңызды бағыты саналады. Осындай сайыстар балаларға ата-анасының белсенді өмір салтын үлгі етіп, бос уақытты пайдалы әрі мазмұнды өткізу мәдениетін қалыптастырады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!







