АҚШ-та өткен аралық сайлауда Техас штатының губернаторы қызметіне Демократиялық партия өкілі Джина Инохосаның сайлануы және бірқатар штаттардағы демократтардың жеңісі ел тарихындағы ең ауқымды инвестициялық қарқынға тосқауыл қоюы мүмкін, деп хабарлайды Ertenmedia.kz.
Сарапшылардың пікірінше, бұл саяси өзгеріс жасанды интеллект инфрақұрылымын қарқынды дамытып, соңғы уақытта Америка экономикасының басты қозғаушы күшіне айналған дата-орталықтар желісін кеңейтуді айтарлықтай тежейді.
Алып құрылыс қарқыны тежелуі мүмкін
Goldman Sachs талдаушыларының бағалауынша, алдағы қаңтар айынан бастап жасанды интеллект нысандары құрылысына мораторий жариялауды қолдайтын немесе шектеулерді ұзартқысы келетін демократ губернаторлардың бақылауындағы штаттар АҚШ-та жоспарланған дата-орталықтар қуатының 45 пайызын құрайды. Ең маңыздысы – ел аумағында жоспарланған ЖИ инфрақұрылымының төрттен бір бөлігі дәл Техас штатына тиесілі.
ING экономистерінің есебінше, жасанды интеллект саласындағы инвестициялық дүмпу биыл АҚШ-тың жалпы экономикалық өсімінің 25 пайызына дейінгі бөлігін қамтамасыз етті.
Сайлау барысында тұрғындардың электр энергиясы мен ауыз су тапшылығына, қоршаған ортаның бүлінуіне қатысты шағымдарын көтерген Джина Инохоса жаңа дата-орталықтар құрылысына мораторий енгізуді басты уәделерінің бірі етті. Штат басшысы аталған салада қатаң бақылаудың қажет екенін ашық айтты.
«Біздің Техас әрдайым бизнесті қолдап келді, алайда бұдан былай қарым-қатынас техастықтардың мүддесіне қызмет ететін серіктестікке айналуы тиіс. Қазіргі уақытта деректер орталықтары ауылдық аймақтарға кіріп, тұрғындарды қорғайтын нақты ережелерсіз жұмыс істеуде», – деп атап өтті сайланған губернатор Инохоса.
Қор нарығындағы күйзеліс және Уолл-стриттегі күмән
Сайлау қорытындысы жарияланғаннан кейін технологиялық алпауыттар шоғырланған Nasdaq индексі 5,5 пайызға дейін құлдырап, түзету (коррекция) аймағына енді. Чип өндірушілер мен дата-орталықтарды жабдықтайтын негізгі серіктестердің бағалы қағаздары күрт арзандады. Илон Маск басқаратын Tesla мен SpaceX акциялары да құлдырауды бастан кешірді.
Әрине, дауыс беру нәтижесі барлық жобалар толық тоқтайды дегенді білдірмейді. Жасанды интеллектіге сұраныс әлі де аса жоғары. Президент Дональд Трамп инновацияларға қойылатын кез келген шектеулерге вето қоюға дайын екенін мәлімдегенімен, жергілікті деңгейдегі саяси қарсылық жобалардың жүзеге асу мерзімін созатыны сөзсіз.
Бәсеңдеудің оң тұстары бар ма?
Сарапшылардың айтуынша, қарқынның бәсеңдеуі белгілі бір экономикалық пайда да әкелуі ықтимал. Тізгінсіз кеңею энергия бағасын өсіріп, инфляцияның қайта жандануына ықпал еткен еді. Сонымен қатар алып технологиялық кешендердің жергілікті тұрғындар арасында наразылық тудырғаны жасырын емес.
Уолл-стриттегі кейбір күмәнді бизнес-модельдер мен негізсіз шығындардың тоқтатылуы жасанды интеллект индустриясын ұзақ мерзімді, әрі экологиялық және экономикалық тұрғыдан орнықты арнаға түсіруі мүмкін.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
