Алматыда әйелдерге арналған «Ұмай» жеңілдетілген ипотекалық бағдарламасының екінші кезеңіне өтінім қабылдау басталған күні Отбасы банктің бөлімшелерінің бірінде үлкен дүрбелең орын алды. Таңғы уақыттан бастап жиналған жүздеген адам есікке таласып, ғимаратқа кіру үшін жаппай қысылыс мен ұзын-сонар кептеліс туғызды, деп хабарлайды Ertenmedia.kz.
Жетісудағы кептеліс: таңғы сағат тоғыздағы есікке талас
Әлеуметтік желілерде кеңінен тараған бейнежазбада қаладағы Жетісу шағынауданында орналасқан банк бөлімшесінің алдында халықтың иін тіресіп, сығылысып тұрғаны көрінеді. Баспана кезегіне ілігуге асыққан адамдар күзетшілерге бой бермей, есікті бұзып кіруге шақ қалған. Көпшіліктің айқай-шуы мен өзара керісі көшені басына көтерді.
Клиенттерге ипотека рәсімдеу бойынша көмек көрсететін бейнежазба авторы Қайрат таңғы сағаттардан бастап жұрттың өз бетінше қағазға тізім жасап, кезек үшін дауласқанын жеткізді. Оның айтуынша, бағдарлама әйелдерге арналған болса да, кезекте ер азаматтардың да көп жүруіне банктің некедегі екі жұбайдың да жеке қатысуын талап етуі себеп болған.
«Адамдардың көбі ипотеканы ресімдеу үшін банкке жеке келуді жөн көреді, сондықтан таңғы сағаттардан бастап осындай ұзын кезекте тұр», – деді ол.
20 миллиард теңгелік лимит және халықтағы үрей
Адамдардың таңғы аязда банк табалдырығын тоздыруына бағдарлама қаржысының санаулы сағатта таусылып қалу қаупі түрткі болды. Азия даму банкі бұл жолғы екінші траншқа 20 миллиард теңге бөлген болатын.
Алайда тамыз айының соңында өткен алғашқы кезеңде бөлінген 9 миллиард теңге небәрі жеті сағаттың ішінде толықтай игеріліп, өтінім қабылдау жабылып қалған еді. Сол кезде мыңдаған әйел құжаттарын тапсырып үлгермей, далада қалған болатын. Дәл осы үрей мен сенімсіздік халықты таң атпай банк есігін күзетуге мәжбүрледі.
Банктің түсініктемесі: құлаған сервистер мен үлкен жүктеме
Отбасы банк өкілдері өтінім қабылдаудың ресми басталғанын, бірақ тым көп қолданушының бір мезетте кіруі салдарынан ақпараттық жүйелердің сыр бергенін растады. Бастапқы екі жарым сағат ішінде жүйе арқылы 300-ден астам өтінім ғана өңделген.
Банктің баспасөз қызметі орын алған қолайсыздықтарға байланысты ресми түсініктеме берді.
«Өтінімдерді қабылдау басталған күні банктің қызметтеріне өте жоғары жүктеме түсті, соның салдарынан клиенттердің бір бөлігі кеңес алу және құжаттарды тапсыру кезінде кідірістерге тап болды. Банк сервистердің жұмысын тұрақтандыру үшін барлық шараларды қабылдап жатыр», – деп хабарлады Отбасы банктің баспасөз қызметі.
Мекеме құжаттарды тек бөлімшеде ғана емес, онлайн бейнеқоңырау немесе кеңесшілер арқылы да тапсыруға болатынын еске салды.
Ertenmedia ракурсы: Цифрландыру дәуіріндегі советтік кезек
Алматыдағы бұл оқиға мемлекеттік цифрландырудың қаншалықты дәрменсіз әрі осал екенін кезекті рет әшкерелеп берді. Қазақстан халықаралық мінберлерде электронды қызметтер мен финтех дамыған ел ретінде мақтанғанымен, нақты өмірде әлеуметтік маңызы бар кез келген бағдарлама басталғанда мемлекеттік серверлер лезде сал болып қалады.
Онлайн өтінім беру порталдары қатып, адамдарды жүйеден лақтырып тастаған соң, халық амалсыздан кеңестік кезеңдегідей қағазға тізім жазып, банк алдында қысылысуға барады.
Неліктен қаржылық институттар «кім бірінші батырманы басып үлгереді» немесе «кім есікті бұзып кіреді» деген жабайы қағидаттан арыла алмайды? Мыңдаған отбасының баспаналы болу арманын арзан ажиотаж бен қорлыққа айналдырмай, өтінімдерді бірыңғай кезекке қойып, скоринг арқылы әділ сұрыптайтын мәдениетті цифрлық жүйе құру соншалықты қиын ба?
Мемлекеттік бағдарламалардың мұндай масқара көрініспен өтуі – мемлекеттік аппараттың жоспарлау қабілетінің жоқтығын көрсетеді. Халықты өз елінде баспана үшін бір-бірімен жағаласуға мәжбүрлеу – цифрлық реформалардың емес, жүйелік қауқарсыздықтың шынайы бейнесі.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
