Астанада 24 шілде күні электрлі аэротаксидің алғашқы ресми көрсетілімі өтеді. AutoFlight Prosperity аппараты сағат 09:00-де «Қазанат» ипподромының аумағынан әуеге көтеріледі, алайда қолайсыз ауа райы ұшу мерзімін өзгертуі мүмкін, – деп жазады Ertenmedia.kz.
Көрсетілімге электр қуатымен жүретін, тігінен көтеріліп-қонатын eVTOL санатындағы аппарат таңдалған. Оған кәдімгі ұшақ секілді ұзын ұшу-қону жолағы қажет емес. Аэротакси шағын алаңнан тік көтеріліп, биіктікке шыққан соң қанатты ұшақ режиміне ауысады.
Ұйымдастырушылар Prosperity сағатына 200 шақырым жылдамдықпен ұшып, бір қуаттаумен 200 шақырымға дейін жол жүретінін хабарлады. Жарияланған ақпаратта салон бір пилот пен бес жолаушыға есептелгені айтылған. Алайда AutoFlight компаниясының ресми техникалық құжатында аппарат бес орындық, яғни пилотты қоса есептегенде төрт жолаушыға арналған деп көрсетілген.
Өндірушінің сипаттамасына сәйкес, Prosperity моделінің ең ұзақ ұшу қашықтығы 250 шақырымнан асады. Қанатының құлашы 14,5 метр, ұзындығы 11,6 метр, ал ең жоғары ұшу салмағы шамамен екі тоннаға жетеді. Аппаратта тігінен көтерілуге арналған он және көлденең ұшуға арналған үш электрлі бұранда бар.
Астанадағы шара Қазақстандағы алғашқы eVTOL ұшуы саналмайды. Мұндай аппарат 2026 жылғы 19 мамырда Алатау қаласында алғаш рет сыналып, он минуттық демонстрациялық ұшу жолаушысыз орындалды. Ұшу жердегі басқару бекетінен қадағаланып, аппарат бастапқы алаңына қайта қонған.
Ұшатын такси елордаға келді
Жобаны қазақстандық Alatau Advance Air Group компаниясы AutoFlight және халықаралық серіктестермен бірге дамытып жатыр. Алатау қаласында арнайы қону алаңы салынып, кейін оны қалалық әуе мобильділігінің өңірлік орталығына айналдыру жоспарланған. Тараптар Қазақстан мен Орталық Азия нарығына қосымша 50 eVTOL жеткізу жөнінде меморандумға да қол қойған.
Дегенмен «Қазанаттағы» көрсетілім Астанада жолаушы тасымалы басталады деген сөз емес. Коммерциялық рейске дейін аппарат авиациялық сертификаттан өтіп, пилот даярлау, әуе қозғалысын басқару және қауіпсіздік талаптары бекітілуге тиіс. Алғашқы ақылы сынақ рейстері 2028 жылдың соңы немесе 2029 жылдың басына жоспарланып отыр.
Жүйені іске қосу үшін қалаларда вертипорттар, қуаттау станциялары және төмен биіктіктегі әуе қозғалысын бақылайтын цифрлық инфрақұрылым қажет болады. Алатау мен Алматы маңында 2028 жылға қарай алты қону алаңын іске қосу жоспары айтылған. Жоба жүзеге асса, аэротакси әуежай, қала орталығы және туристік аймақтар арасындағы жол уақытын қысқартуы мүмкін.
Көрсетілімнен кейін аппарат «Болашақ ойындары – 2026» халықаралық турнирінің көрме алаңына қойылмақ. Фиджитал спортты технологиямен ұштастыратын жарыс Астанада 29 шілде мен 9 тамыз аралығында өтеді. Оған әлемнің 50-ден астам елінен 800-ден аса спортшы қатысады.
Аэротакси әзірге күнделікті көлік емес, Қазақстанда қалыптасып келе жатқан төмен биіктік экономикасының тәжірибелік жобасы саналады. Оның болашағын әсерлі көрсетілімнен бұрын сертификаттау нәтижесі, ауа райына бейімділігі, билет бағасы және қауіпсіздік жүйесі айқындайды. «Қазанаттағы» ұшу жаңа технологияның мүмкіндігін көрсеткенімен, оны тұрақты көлікке айналдыру үшін әлі бірнеше күрделі кезеңнен өту қажет.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
