Астананың алдағы жылу маусымына дайындық жұмыстары көктемнен бері жүргізіліп келеді. Қала әкімі Жеңіс Қасымбек инженерлік желілерді жөндеумен қатар, елорданың өсіп келе жатқан қажеттілігін өтеуге арналған ірі энергетикалық нысандар салынып жатқанын мәлімдеді, – деп жазады Ertenmedia.kz.
Әкімнің айтуынша, күз-қыс кезеңін тұрақты әрі қауіпсіз өткізу қаланың қалыпты тіршілігін қамтамасыз ететін негізгі міндеттердің бірі саналады. Осыған байланысты жылу энергетикасы кешенінің жабдықтары жаңартылып, электр және жылу желілеріне кешенді жөндеу жүргізіледі.
Биыл ЖЭО-1 нысанындағы 10 қазандық пен үш турбинаны жөндеу жоспарланған. ЖЭО-2-де 14 қазандық пен алты турбогенератор жөндеуден өтеді. Бұл жұмыстар станциялардың қысқы жүктеме кезінде тұрақты жұмыс істеуіне және апат қаупін азайтуға бағытталған.
Сонымен бірге 7,5 шақырым жылу желісі күрделі жөндеуден өткізіліп, реконструкцияланады. Бұдан бөлек, 67,4 шақырым әуе және кабель желісін, 68 тарату және трансформаторлық қосалқы пунктті, сондай-ақ электр инфрақұрылымының басқа нысандарын жаңарту көзделген.
Қаланың аумағы кеңейіп, тұрғындар саны өскен сайын жылу мен электр қуатына деген сұраныс та артып келеді. Сондықтан қолданыстағы жабдықтарды жөндеумен шектелмей, жаңа қуат көздерін іске қосу маңызды болып отыр.
Жаңа станциялар жылу резервін қалыптастырады
Қазір «Телман» газ жылу станциясының құрылысы жүріп жатыр. Нысанның жылу өндіру қуаты сағатына 620 Гкал болады. Станцияны биыл пайдалануға беру жоспарланған. Ол елорданың бірқатар жаңа ауданы мен тұрғын алабын тұрақты жылумен қамтуға мүмкіндік береді.
ЖЭО-2-нің су жылытатын қазандығын кеңейту және реконструкциялау жұмыстары да қолға алынған. Мұнда №7 және №8 су жылытатын қазандықтар орнатылады. Жоба жүзеге асқанда станцияның жылу қуаты сағатына қосымша 360 Гкал-ға артады. Жаңа жабдықтарды келесі жылы іске қосу жоспарланып отыр.
Бас жоспарға сәйкес «Оңтүстік-Шығыс» және «Оңтүстік-Батыс» газ жылу станцияларын кеңейту бойынша жобалау-іздестіру жұмыстары жүргізілуде. Екі нысанның жиынтық жылу өндіру қуаты сағатына 940 Гкал болады.
Жеңіс Қасымбектің айтуынша, аталған жобалар елорданың жылу өндіру мүмкіндігін арттырып қана қоймай, қажетті қуат резервін қалыптастырады. Сонымен қатар қаланың тіршілігін қамтамасыз ететін инженерлік жүйелердің сенімділігі артып, жаңа тұрғын аудандарды жылумен қамтуға жағдай жасалады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
