Банктен құны 13 миллиард теңгеден асатын мыңдаған инвестициялық алтын монетаның жоғалуына қатысты тергеу жүріп жатыр, деп жазады Ertenmedia.kz.
Ресейлік БАҚ мәліметінше, әңгіме 8893 алтын монета туралы болып отыр. Тергеу нұсқасы бойынша, банк кеңсесінің басшысы мен клиенттермен жұмыс істейтін менеджер алтын монеталардың жоғалуына қатысы болуы мүмкін. Монеталардың жалпы нарықтық құны 2 миллиард рубльден асады. Бұл шамамен 13,3 миллиард теңгеге тең.
Пропажа 20 маусымда анықталған. Банктің сақтау қоймасынан Ресей Банкі шығарған «Георгий Победоносец» сериясындағы 999 сынамалы инвестициялық алтын монеталар жоғалған. Мұндай монеталар әдетте жинақ сақтау, инвестиция салу және алтынға ұзақмерзімді қаражат орналастыру құралы ретінде пайдаланылады.
Тергеу дерегіне сәйкес, қоймадан номиналы 50 рубль болатын 4515 монета, номиналы 100 рубль болатын 241 монета және номиналы 200 рубль болатын 4137 монета жоғалған. Монеталардың номиналдық құны 1 миллион рубльден сәл асқанымен, олардың нақты бағасы құрамындағы алтынға байланысты бірнеше мың есе жоғары.
Ресейлік ақпарат құралдарының есебінше, жоғалған алтынның жалпы салмағы 160 келіден асуы мүмкін. Дәл осы дерек сарапшылардың күдігін күшейтіп отыр. Себебі мұндай көлемдегі бағалы металды сақтау қоймасынан алып шығу, тасымалдау және кейін жасыру екі адамның ғана әрекеті болуы екіталай деген пікір айтылуда.
Қауіпсіздік саласы өкілдері бұл іске банк ішіндегі тәртіпті, құндылықтарды сақтау жүйесін және ішкі құжат айналымын жақсы білетін басқа адамдардың қатысуы мүмкін екенін жоққа шығармайды. Тергеу енді күдіктілердің өз бетінше әрекет етті ме, әлде ұйымдасқан топ болды ма деген сұраққа жауап іздейді.
160 келі алтынның ізі
Бұл істің ерекшелігі, жоғалған зат қолма-қол ақша немесе зергерлік бұйым емес, инвестициялық монета. Мұндай монеталар қаржы ұйымдарында есепке алынады, партиялары құжатпен жүреді және шығу тегі анық болады. Сондықтан оларды заңды нарықта ірі көлемде сату оңай емес.
Қаржы мамандары ірі партиядағы инвестициялық монеталарды сату кезінде олардың сертификаты, есептік дерегі және құжаттық тарихы маңызды екенін айтады. Бұл активтерді қарапайым алтын бұйым сияқты өткізу қиын. Сол себепті тергеу бірнеше нұсқаны қарастырып жатыр.
Бір нұсқа бойынша, монеталар балқытылып, құйма немесе алтын сынығы ретінде сатылуы мүмкін. Екінші нұсқада олар шағын партиямен өткізілуі ықтимал. Үшінші нұсқа бойынша, бағалы металл ел аумағынан тыс жерге шығарылуы мүмкін. Әзірге бұл болжамдардың қайсысы расталатыны белгісіз.
Пропажа анықталғаннан кейін құқық қорғау органдары банк кеңсесінің басшысы мен менеджерді ұстады. Сот менеджерге үйқамақ түріндегі бұлтартпау шарасын таңдаған. Ал кеңсе басшысы тергеу изоляторына қамауға алынғаны хабарланды.
Іс аса ірі көлемдегі ұрлық бойынша тергеліп жатыр. Тергеушілер жоғалған монеталардың қайда кеткенін, оларды сату әрекеті болды ма, сондай-ақ банктің ішкі бақылау жүйесі қалай айналып өтілгенін анықтауы керек.
Бұл оқиға Ресейдегі соңғы жылдардағы ең ірі банктік хищение деректерінің бірі ретінде аталып жатыр. Оның көлемі ғана емес, сипаты да ерекше. Әңгіме чемоданға салынған ақша емес, салмағы екі ересек адамның салмағымен шамалас алтын туралы болып отыр.
Қазірге дейін құқық қорғау органдары жоғалған монеталардың табылған-табылмағанын нақты хабарлаған жоқ. Банкке келтірілген шығынның өтеле ме, жоқ па, тергеу қорытындысынан кейін белгілі болады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
