Президент Тоқаев АҚШ-тың ашық чемпионатында топ жарып, әлемнің бірінші ракеткасы атанған Елена Рыбакинамен кездесті, деп хабарлайды Ertenmedia.kz.
Кездесу барысында Мемлекет басшысы отандық спорт тарихындағы тарихи жеңістің мән-маңызына тоқталып, спортшыны жеке жетістігімен құттықтады. Сонымен қатар оның теннисті насихаттауға қосқан айрықша еңбегін жоғары бағалап, ІІІ дәрежелі «Барыс» орденімен марапаттады.
Балаларға үлгі болған чемпион
Президент Рыбакинаның халықаралық деңгейдегі жеңістері еліміздегі мыңдаған жасөспірімнің спортқа деген құштарлығын оятқанын атап өтті. Атап айтқанда, корттағы әрбір жарқын ойын өскелең ұрпақтың үлкен спортқа қадам басуына зор серпін береді.
«Сіздің жеңістеріңізден кейін балаларымыз тенниске қызығушылық танытып, секцияларға көптеп жазылып, олар да чемпион болуды армандайды. Сіз балаларымызға оң үлгі көрсетесіз, бұл өте жақсы. Балаларымыз спортқа баулуы керек, бұл олардың болашағы үшін аса маңызды. Үлкен дулыға турнирлеріндегі үш жеңіс теннис шежіресінде мәңгі қалады. Осымен тоқтап қалмай, жеңіс жолыңызды әрі қарай жалғастыра бересіз деп сенемін», – деді Президент Тоқаев.
Жоғары мәдениет пен ел намысы
Мемлекет басшысы спортшының корттағы шеберлігінен бөлек, оның кішіпейілдігі мен қарапайымдылығына, жалпы жоғары жеке мәдениетіне ерекше назар аударды. Мұндай өнегелі ұстаным Қазақстанның халықаралық аренадағы мәдени және өркениетті бейнесін айшықтай түсетінін жеткізді.
Өз кезегінде Елена Рыбакина ел басшысына тұрақты қолдауы мен елімізде үлкен теннисті дамытуға жасалып жатқан жағдай үшін ризашылығын білдірді. Ол Қазақстанның көк байрағын әлемдік жарыстарда желбірету зор мақтаныш екенін айтып, алдағы додаларда да жанкүйерлерді жаңа белестермен қуантуға күш салатынын айтты.
Тарихи көрсеткіштер
Қазақстандық теннисші Нью-Йоркте өткен US Open турнирінің шешуші матчында әлемдік рейтингтің бұрынғы көшбасшысы Арина Соболенкодан басым түсіп, мансабында алғаш рет осы трофейді жеңіп алды. Нәтижесінде ол WTA рейтингінде көш бастап, әлемнің бірінші ракеткасы атанған тұңғыш қазақстандық ретінде тарихқа енді.
Рыбакина бұған дейін 2022 жылы Уимблдонды бағындырса, осы маусымда Australian Open турнирінде де қарсылас шақ келтірмеген болатын. Осылайша, спортшы қазірдің өзінде «Үлкен дулыға» санатындағы үш бірдей аса беделді кубокты қоржынына салды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
