Жапония халықаралық ынтымақтастық банкі (JBIC) АҚШ экономикасына бағытталатын 550 миллиард долларлық инвестициялық бағдарлама аясында жобаларды іріктеу ісінде Токионың құқығын кеңейтуді көздейді, деп хабарлайды Ertenmedia.kz.
Бұл туралы Токиода өткен «Raisina Tokyo» диалогы кезінде JBIC басқарма төрағасы Тадаси Маэда мәлімдеді. Аталған бастама Жапонияның америкалық нарыққа шығаратын тауарларына салынатын баж салығын 15 пайызға дейін төмендету туралы екіжақты келісімнің негізгі шарты саналады.
Қолданыстағы тетік пен Токионың талабы
Қазіргі тәртіп бойынша қаржыландыруға лайықты жобаларды Вашингтон өзі белгілейді. Ал жапон тарапы тек кеңес беруге қатысып, әрбір жобаның қаржылық талаптарға сәйкестігін бағалайды. Тадаси Маэда бұл қағиданы қайта қарап, Жапонияға жобаларды бастапқы кезеңнен бастап тікелей ұсынуға мүмкіндік беру қажет деп санайды.
JBIC басшысының айтуынша, банк кеңесу процесі арқылы елдің экономикалық мүдделерін қорғауға тырысып келеді. Дегенмен бастаманы кеңейту үшін шешім қабылдау үдерісін өзгерту қажет.
«Жапония жобаларды бастапқы деңгейден бірлесіп әзірлеуге тікелей қатыса алатындай етіп қолданыстағы тетікті қайта қараған орынды болар еді», – деді Тадаси Маэда.
Жүз миллиард доллардан асқан алғашқы жобалар
Қос мемлекет бағдарлама шеңберінде жалпы құны 100 миллиард доллардан асатын жеті жобаны жариялап үлгерді. Олардың қатарында Нью-Йорктегі GlobalFoundries жартылай өткізгіш зауыты, сондай-ақ Техас пен Огайо штаттарындағы ірі энергетикалық нысандар бар.
Инвестициялық жоспарды жүзеге асыру үшін мемлекеттік банкпен бірге жапондық мегабанктер мен сақтандыру құрылымдары белсенді түрде тартылуда.
Жеткізу тізбегі және Үндістан нарығы
Сонымен қатар Маэда жаһандық жеткізу тізбегін әртараптандыру мәселесіне де тоқталды. Оның пікірінше, Үндістанның қалыптасып келе жатқан микрочип өнеркәсібі өндірісті Қытайдан алшақтатуға және Тайваньдағы чип шығару шоғырлануынан туындайтын тәуекелдерді азайтуға көмектеседі.
JBIC Үндістанның өндірістік дәліздерін дамыту жөніндегі ұлттық корпорациясында (NICDC) 26 пайыздық үлеске ие және жаңа бағыттағы инфрақұрылымды дамытуға белсенді атсалысуда.
Токио АҚШ-пен бірлескен ауқымды қаржылық бастаманы тек тарифтік жеңілдікпен шектемей, өз ұлттық өнеркәсібінің ұзақ мерзімді қауіпсіздігіне бағыттауға ниетті.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!







