Алматыда қаланың санитарлық жағдайы мен көркін жақсарту мәселесі қайтадан қатаң бақылауға алынды, деп жазады Ertenmedia.kz.
Қала әкімі Дархан Сатыбалды осы мәселеге арналған арнайы кеңес өткізіп, аудан-ауданға ортақ бірнеше түйінді бағытты нақтылады. Жиында аумақтарды тазалау, көшелер мен қоғамдық кеңістіктердің жай-күйі, қалалық инфрақұрылымды бояу және жаңарту жұмыстары кеңінен талқыланды.
Әңгіме жай ғана көрік туралы емес, мегаполистің күнделікті өмір сапасына тікелей әсер ететін жүйелі тәртіп жайында өрбіді.
Қазір Алматыда ағаштарды санитарлық мақсатта кесу, тозған инфрақұрылымды ретке келтіру және арық жүйесін су тасқыны кезеңіне дайындау жұмыстары жалғасып жатыр. Мұндай тірлік сырт көзге маусымдық науқан болып көрінуі мүмкін. Алайда алып шаһар үшін оның салмағы әлдеқайда ауыр.
Арық бітелсе, көше суға кетеді. Бояуы кеткен, тозығы жеткен нысан көбейсе, қала келбеті көмескі тартады. Ал уақытылы күтіп-бапталмаған жасыл желек қауіпсіздікке де әсер етуі мүмкін.
Сондықтан қала билігі тазалық пен абаттандыруды ұсақ мәселе деп қарамай, оны басқару сапасының бір өлшеміне айналдырып отыр. 1 сәуірден бастап енгізілген «Бір аудан – бір мердігер» қағидаты да осы тәртіпті күшейтуге бағытталған. Яғни әр аумаққа жауапкершілік нақты бекітіледі, кімнің не үшін жауап беретінін анық көруге болады. Мұндай тәсіл жұмыстың шашырап кетпеуіне, бақылаудың күшеюіне және нәтижені нақты сұрауға мүмкіндік береді.
Қалада цифрлық шешімдерді енгізу мәселесі де қаралып жатыр. Егер бұл жүйе толық іске қосылса, жұмыстың орындалуын және техниканың қозғалыс бағытын нақты уақыт режимінде бақылауға жол ашылады.
Қарапайым тілмен айтқанда, енді тазалық пен жөндеу жұмысы қағаздағы есеппен ғана емес, цифрлық бақылаумен де өлшенуі мүмкін. Мұның өзі мердігердің тәртібіне, атқарылған істің ашықтығына және тұрғын сеніміне әсер ететін маңызды қадам.
Алматы үшін мұндай шешімдер аса қажет. Өйткені мегаполис тек жаңа ғимаратпен, көлік ағынымен немесе бизнес белсенділігімен өлшенбейді.
Қала мәдениеті оның көшесінің тазалығынан, арығының ашықтығынан, боялған қоршауынан, күтім көрген ағашынан да көрінеді. Қала әкімдігі қолға алған осы жұмыстар нәтижелі жүрсе, Алматының сыртқы ажары ғана емес, ішкі тәртібі де күшейе түспек.
Көктем келгенде Алматының ажары мүлде бөлек ашылады. Ағаш бүр жарып, көше бойы құлпырып сала береді. Ауа жеңілдеп, қала тынысы өзгереді. Осындай шақта көгалдандыру мәселесі жай көріктендіру науқаны болып қалмайды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
