2027 жылдың 1 қаңтарынан бастап Қазақстанның екі бірдей бас архивіне ресми түрде «Ұлттық» мәртебесі беріледі. Президент Тоқаев тиісті жарлыққа қол қойып, мекемелердің құқықтық деңгейін бекітті, деп хабарлайды Ertenmedia.kz.
Ғасырлық мұра мен заманауи қор
Жаңа мәртебеге Орталық мемлекеттік архив пен Ұлттық архив ие болады.
Қос мекемеде ел шежіресінен сыр шертетін 1,7 миллионнан астам құнды тарихи құжат пен материалдар шоғырланған.
Орталық мемлекеттік архив 1921 жылдан бері қызмет етіп келеді. Оның қорында мемлекеттіліктің қалыптасу кезеңдерін қамтитын 1,3 миллионнан аса сирек кездесетін іс сақтаулы тұр. Ал 2006 жылы елордада ашылған Ұлттық архив қорында 405 мыңнан астам сақтау бірлігі жинақталған.
Жаңа мәртебе қандай мүмкіндік береді?
Мемлекеттік деңгейдегі жаңа дәреже архивтердің ұлт жадын сақтаушы ретіндегі ерекше рөлін айшықтайды. Сонымен қатар мекемелердің алдына бірқатар стратегиялық міндеттер қойылып отыр:
Көне әрі құнды құжаттардың физикалық қауіпсіздігін күшейту және қорғау;
Миллиондаған архивтік материалды заманауи талапқа сай цифрлық форматқа көшіру;
Отандық және шетелдік ғалымдар мен ізденушілер үшін қорлардың қолжетімділігін жеңілдету.
Архивтерді жаңғырту мен олардың мәртебесін көтеру – елдің төл тарихын жүйелеуге және мәдени мұраны келешек ұрпаққа бүлінбей жеткізуге бағытталған маңызды қадам.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
