Батыс Қазақстан облысының Қаратөбе ауданынан велосипедпен жолға шыққан ұстаз Асылбек Айболатов бірнеше өңірді басып өтіп, Астанаға жетті. Велосапар барысында ол тұрғындармен кездесіп, жиналған ұсыныс-пікірлерді «Ақ жол» Демократиялық партиясының басшылығына табыстады, – деп жазады Ertenmedia.kz.
Асылбек Айболатов сапарын Қаратөбе ауданынан бастап, Ақтөбе, Қостанай және Көкшетау арқылы елордаға бағыт алды. Мыңдаған шақырымға созылған жол спорттық бастамамен ғана шектелмеді. Ұстаз елді мекендерге арнайы тоқтап, жергілікті тұрғындардың күнделікті мәселелері мен ұсыныстарын тыңдады.
Кездесулер барысында ол азаматтарға «Ақ жол» партиясының негізгі ұстанымдары мен бастамаларын таныстырды. Сонымен қатар өңірлердегі әлеуметтік, экономикалық және тұрмыстық мәселелерге қатысты пікірлерді жинақтады.
Астанаға жеткен велосаяхатшыны партияның елордалық филиалы мен Жастар кеңесінің өкілдері қарсы алды. Сапар кезінде тұрғындардан жиналған өтініштер мен ұсыныстар партия басшылығына берілді.
Партия төрағасы Дания Еспаева мұндай бастаманың қоғаммен тікелей байланыс орнатудағы маңызына тоқталды.
– Кабинетте отырып, адамдардың мұң-мұқтажын толық білу мүмкін емес. Сіз халықтың үнін тікелей жеткізіп отырсыз. Мұндай ұсыныстар біз үшін маңызды және партия жұмысында ескеріледі, – деді Дания Еспаева.
Оның айтуынша, елді мекендерді аралап, тұрғындармен бетпе-бет сөйлесу саяси ұйымға жергілікті мәселелерді нақтырақ түсінуге мүмкіндік береді. Партия төрағасы Асылбек Айболатовтың сапарын азаматтық белсенділік пен табандылықтың көрінісі ретінде бағалады.
Кездесу кезінде Асылбек Айболатов «Ақ жол» Демократиялық партиясының қатарына ресми түрде қабылданды. Дания Еспаева оған партиялық билетті табыстап, алдағы қоғамдық-саяси қызметіне сәттілік тіледі.
Осылайша, Қаратөбеден басталған велосапар Астанада саяси әрі азаматтық қорытындыға ұласты. Жол бойында жиналған ұсыныстар енді партияның тиісті құрылымдарында қаралып, алдағы жұмыс барысында ескеріледі.
Велосапардың негізгі нәтижесі де осы болды: өңір тұрғындарының мәселелері мен бастамалары арадағы бірнеше әкімшілік сатыны айналып өтіп, партия басшылығына тікелей жеткізілді. Ал Асылбек Айболатов енді қоғамдық жұмысын «Ақ жол» партиясының мүшесі ретінде жалғастырады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
