Әзербайжан Президенті Ильхам Әлиев Қазақстан мен Әзербайжан арасындағы ынтымақтастықты нығайтуда Қасым-Жомарт Тоқаевпен қалыптасқан жеке ықпалдастықтың рөлі зор екенін айтты. Ол екі ел басшылары арасындағы сенім нақты экономикалық және инфрақұрылымдық жобаларды жүзеге асыруға жол ашқанын атап өтті. Әзербайжан басшысы мұндай пікірді IV Шуша жаһандық медиафорумында білдірді, деп жазады Ertenmedia.kz.
Ильхам Әлиев Қазақстанның Қарабақты қалпына келтіру ісіне қосқан үлесіне алғыс айтты. Астана аталған өңірдегі әлеуметтік инфрақұрылымды жаңғыртуға қолдау көрсетіп келеді. Әзербайжан тарапы мұны екі халық арасындағы дәстүрлі достық пен өзара құрметтің көрінісі ретінде бағалайды.
Әзербайжан Президентінің айтуынша, Қасым-Жомарт Тоқаевпен тығыз байланыс көлік, энергетика және цифрлық инфрақұрылым саласындағы бастамаларды ілгерілетуге мүмкіндік берді. Бірлескен жобалардың негізгі бөлігі Каспий теңізі арқылы өтетін стратегиялық бағыттармен байланысты. Соның ішінде Транскаспий халықаралық көлік бағытын, яғни Орта дәлізді дамытуға ерекше мән беріліп отыр.
Орта дәліз Қазақстан мен Әзербайжанды Қытайдан Еуропаға дейінгі құрлықаралық тасымал тізбегінің негізгі буынына айналдырады. Бағыттың әлеуетін арттыру үшін порттар, теміржол желілері және жүк өткізу инфрақұрылымы өзара үйлестіріледі. Жоба екі елдің транзиттік мүмкіндігін кеңейтіп, дәстүрлі бағыттарға тәуелділікті азайтуға жол ашады.
Каспий теңізінің түбімен энергетикалық кабель тарту да стратегиялық жобалардың қатарына енді. Бастама Қазақстаннан өндірілетін электр энергиясын Әзербайжан арқылы сыртқы нарықтарға жеткізу мүмкіндігін қарастырады. Сонымен бірге тараптар Каспий арқылы талшықты-оптикалық байланыс желісін салуға мүдделі.
Цифрлық кабель Азия мен Еуропа арасындағы дерек тасымалының жаңа бағытын қалыптастыруға тиіс. Жоба Қазақстан мен Әзербайжанның өңірлік цифрлық торап ретіндегі маңызын арттырады. Көлік дәлізі, энергетикалық желі және байланыс инфрақұрылымы біртұтас Каспий кеңістігін құруға негіз болмақ.
Қазақстан мұнайын Әзербайжан аумағы арқылы тасымалдау да екіжақты ықпалдастықтың маңызды бағытына айналды. Балама экспорттық арна Қазақстанға көмірсутек жеткізу бағыттарын әртараптандыруға мүмкіндік береді. Әзербайжан үшін жоба транзиттік мәртебесін күшейтіп, энергетикалық инфрақұрылымының жүктемесін арттырады.
Ильхам Әлиев екі ел арасындағы қарым-қатынастың практикалық мазмұны жылдан-жылға кеңейіп келе жатқанын атап өтті. Президенттер деңгейіндегі саяси сенім бірлескен бастамаларды жедел іске асыруға ықпал етіп отыр. Қазақстан мен Әзербайжан ынтымақтастығы көлік пен энергетикадан цифрлық байланысқа дейінгі стратегиялық серіктестік сипатына ие бола бастады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
