2026 жылғы қаңтар–сәуір айларында Қазақстанда сары май мен күнбағыс майын өндіру көлемі артты. Екі өнімнің экспорты да айтарлықтай өскен. Көрсеткіштер отандық қайта өңдеу өнеркәсібінің сыртқы нарықтағы әлеуеті кеңейіп келе жатқанын аңғартады, деп жазады Ertenmedia.kz.
Есепті кезеңде елімізде майлылығы 85 пайыздан аспайтын 13,8 мың тонна сары май өндірілді. Өндіріс көлемі 2025 жылдың сәйкес кезеңімен салыстырғанда 47,4 пайыз өсті. Сары май экспорты да бір жыл ішінде 40,4 пайызға артқан.
2026 жылдың алғашқы төрт айында Қазақстан шетелге 394,1 тонна сары май жөнелтті. Өткен жылдың сәйкес кезеңінде экспорт көлемі 280,7 тонна болған. Отандық өнімнің негізгі нарықтары Ресей, Моңғолия, Қырғызстан және Беларусь болды.
Сары май импорты 2 242,2 тоннаны құрады. Ішкі нарықтағы импорттық өнімнің үлесі 13,9 пайыз деңгейінде қалыптасты. Қазақстанға сары майдың негізгі бөлігі Беларусь пен Ираннан жеткізілген.
Қаңтар–сәуір айларында ішкі нарықта 15,7 мың тонна сары май өткізілді. Өндірістің жедел өсуі ел ішіндегі сұранысты өтеумен қатар, экспорттық бағытты дамытуға мүмкіндік берді. Күнбағыс майы өндірісінде де оң динамика сақталды.
Төрт айда отандық кәсіпорындар 335,5 мың тонна тазартылған және тазартылмаған күнбағыс майын өндірді. Көрсеткіш өткен жылдың сәйкес кезеңінен 13,2 пайыз жоғары. Күнбағыс майының экспорты бір жыл ішінде 49,6 пайызға ұлғайды.
Қазақстан 2026 жылғы қаңтар–сәуір айларында сыртқы нарыққа 353,8 мың тонна күнбағыс майын шығарды. Бір жыл бұрын экспорт көлемі 236,4 мың тоннаны құраған еді. Өсім сыртқы нарықтағы сұраныстың күшейгенін және қазақстандық өндірушілердің жеткізу ауқымын кеңейткенін көрсетеді.
Экспорттың ең ірі бағыты Өзбекстан болды, аталған елге 153,2 мың тонна күнбағыс майы жөнелтілді. Қытайға 127,2 мың тонна, Ауғанстанға 38,6 мың тонна және Тәжікстанға 27 мың тонна өнім экспортталды. Иранға 4,9 мың тонна май жеткізіліп, қалған көлем басқа мемлекеттерге сатылды.
Күнбағыс майының импорты 47,9 мың тоннаны құрады. Импорттық өнімнің ішкі нарықтағы үлесі 12,5 пайыз деңгейінде қалды. 2026 жылдың алғашқы төрт айында Қазақстанның ішкі нарығында 29,7 мың тонна күнбағыс майы өткізілді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
