Саясаттанушы Данияр Әшімбаев Каспийдегі әскери қызметшілердің қазасын билік үшін ауыр саяси және коммуникациялық сынақ деп бағалады. Оның айтуынша, алғашқы күндердегі ақпараттық дағдарыстан кейін мемлекет жағдайды бақылауға алып, жедел әрекеттен жүйелі шешім қабылдауға көшті, – деп жазады Ertenmedia.kz.
Әшімбаевтың сөзінше, Маңғыстау облысындағы қайғылы жағдай қоғамда қатты эмоциялық реакция туғызды. Әскери бюрократияның ебедейсіз әрекеттері ахуалды одан сайын күрделендіріп, әлеуметтік желіде қауесет, жалған ақпарат пен арандатушы жазбалардың таралуына жол ашты. Оқиғаның елдегі әлеуметтік ахуалы күрделі өңірлердің бірінде болуы да жағдайдың саяси салмағын арттырған.
Сарапшы билік бір мезгілде бірнеше бағыттағы жұмысты қатар жүргізгенін атап өтті. Ақпарат тарату, оқиғаны тергеу, отбасыларға көмек көрсету және қоғамдық көңіл күйді тұрақтандыру шаралары өзара үйлестірілді. Алғашқы күйзелістен кейін ресми ақпаратты жариялау мен жалған мәліметті жедел теріске шығарудың нақты тәртібі қалыптасты.
Үкіметтік комиссияны тәжірибелі әрі қоғамға танымал мемлекеттік қызметкердің басқаруы да маңызды қадам болды. Қаза тапқан әскери қызметшілердің отбасыларына жиналған көмекті орталықтандыру қаражаттың ашық әрі мақсатты бөлінуіне мүмкіндік берді. Әшімбаевтың айтуынша, қайырымдылықты жеке жарнама құралына айналдырмауға күш салынған.
Саясаттанушы қалыптасқан ахуалда Президент Қасым-Жомарт Тоқаевтың ұстанымына ерекше назар аударды. Мемлекет басшысы көңіл айтып, кінәлілерді жауапқа тартумен шектелмей, сарбаздардың өміріне мемлекет жауапты екенін ашық айтты. Сонымен бірге Қорғаныс министрлігінің жұмысына қатаң баға беріп, армияны түбегейлі реформалау қажеттігін көтерді.
Данияр Әшімбаевтың ойынша, Тоқаев осы жағдайда нағыз қолбасшыға тән шешім қабылдады. Ол жауапкершілікті басқа құрылымдарға ысырып жібермей, зардап шеккен отбасыларға көмектесу, кінәлілерді анықтау және мұндай қасіреттің қайталануына жол бермеу міндетін қатар қойды. Президенттің кейбір реформалық ұсынысы алдын ала пысықталған жүйелі өзгерістердің бар екенін аңғартқан.
Сарапшы қоғам биліктің осы бағытын дұрыс қабылдады деп санайды. Адамдар мемлекеттен тек көңіл айту сөзін емес, жағдайдың себебін түсінуді және алдағы әрекеттің айқын жоспарын күтті. Оның пікірінше, биліктің кейінгі шешімдері қоғамға жауапкершілік пен өзгеріске дайындықтың саяси белгісін көрсетті.
Әшімбаевтың пайымдауынша, ендігі негізгі міндет жарияланған реформаны нақты нәтижеге жеткізу болмақ. Тергеу ашық жүргізіліп, кінәлі тұлғалар әділ жауапқа тартылып, сарбаздардың қауіпсіздігін қамтамасыз ететін жаңа тәртіп қалыптасуы керек. Әйтпесе алғашқы күндердегі тиімді саяси реакция уақытша ақпараттық жетістік ретінде ғана қалуы мүмкін.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
