Қазақстанда жылжымайтын мүлік пен жер телімдерінің иелері үшін өткен жылдың мүлік салығын өтеуге берілген уақыт таяп қалды, мерзім 1 қазанда түпкілікті аяқталады, деп хабарлайды Ertenmedia.kz.
Мемлекеттік кірістер комитетінің дерегінше, еліміздегі барлық пәтер, жеке тұрғын үй, саяжай, гараж және өзге де ғимараттардың меншік иелері салықты белгіленген мерзімнен кешіктірмей төлеуге міндетті. Салық мөлшері «Азаматтарға арналған үкімет» мемлекеттік корпорациясы есептеген мүліктің базалық құнына және меншік құқығында болған кезеңіне қарай айқындалады.
Мүлік салығы 1 қазанға дейін өтелмесе, келесі күннен бастап әрбір кешіктірілген күн үшін Ұлттық банктің базалық мөлшерлемесінің 1,25 еселенген мөлшерінде өсімпұл автоматты түрде есептеле бастайды.
Берешек өтелмесе не болады?
2 қазаннан бастап салық органдары берешегі бар жеке тұлғаларға ресми хабарламалар таратады. Егер азамат хабарлама алған сәттен бастап 30 жұмыс күні ішінде берешекті жаппаса, оған қатысты мәжбүрлеп өндіріп алу туралы салықтық бұйрық шығарылады.
Салықтық бұйрық шыққаннан кейін 5 жұмыс күні ішінде де тиісті сома төленбесе, іс құжаттары жеке сот орындаушыларына жолданады. Мұндай жағдайда сот орындаушылары борышкердің банктік шоттары мен карталарын бұғаттап, шетелге шығуына тыйым салуға және мүлкіне шектеу қоюға құқылы. Оның үстіне салық сомасына жеке сот орындаушысының өз қызметі үшін алатын қосымша 25 пайызға дейінгі ақысы қосылады.
Салық бұйрығы жеке сот орындаушысына өткен жағдайда, борышкер негізгі салық пен өсімпұлдан бөлек, қарыз көлемінің 25 пайызына дейінгі мөлшерде сот орындаушысының қызмет ақысын да өтеуге мәжбүр болады.
Салық сомасын тексеру және төлеу тәсілдері
Төленуі тиіс нақты соманы Мемлекеттік кірістер комитетінің «e-Salyq Azamat» мобильді қосымшасынан, электрондық үкімет порталынан (eGov.kz) немесе екінші деңгейдегі банктердің қосымшаларындағы «Төлемдер» бөлімінен жеке сәйкестендіру нөмірі (ЖСН) арқылы бірден көруге болады.
Мемлекеттік органдар артық шығын мен сот орындаушыларының шектеулеріне тап болмас үшін төлемдерді 1 қазанға дейін кешіктірмей аяқтауды ескертеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
