Ормуз бұғазының оңтүстік бөлігіндегі «рұқсат етілмеген бағытпен» өтпек болған супертанкер екі теңіз минасына соғылып, өртенді. Кеменің қай елге тиесілі екені және экипаж мүшелерінің жағдайы әзірге белгісіз, – деп жазады Ertenmedia.kz.
Оқиға туралы Иран Ислам революциясы сақшылар корпусының Әскери-теңіз күштері хабарлады. Ведомство мәліметінше, алып танкер бұғаздың оңтүстік дәлізімен қозғалған. Екі минаға соғылған соң кемеде алапат өрт басталып, танкер толық тоқтаған.
Иран тарапы супертанкердің атауын, жалауын және иесі саналатын компанияны жарияламады. Борттағы экипаж саны мен теңізшілердің ахуалы жөнінде де ресми мәлімет берілген жоқ. Әзірге Тегеранның мәлімдемесін тәуелсіз дереккөздер толық растаған жоқ. Tasnim агенттігі де оқиғаны Иран әскери ведомствосының ақпаратына сүйеніп таратты.
Ислам революциясы сақшылар корпусы Ормуз бұғазындағы қауіпсіздік тәртібін бұзатын өзге кемелер де осындай салдарға ұшырауы мүмкін екенін ескертті. Иран әскери басшылығы халықаралық кеме қатынасы компанияларын белгіленген бағыт пен өткізу регламентін қатаң сақтауға шақырды.
Мәлімдемеде тасымалдаушыларға АҚШ әскерінің нұсқауына ермеу жөнінде талап айтылған. Тегеран мұндай әрекет экипаж өміріне, кеме мен тасымалданатын жүкке орынсыз қауіп төндіреді деп санайды. Иран тарапы бұғаздың оңтүстік бөлігіндегі кейбір маршруттарды заңсыз деп бағалап отыр.
Алайда Ормуздағы навигациялық тәртіпке қатысты Вашингтон мен Тегеранның ұстанымы бір-біріне қайшы. АҚШ халықаралық кеме қатынасының еркіндігін алға тартса, Иран қауіпсіздік ережесін бұзған кемелерге тосқауыл қою құқығын өзінде қалдыратынын мәлімдеп келеді.
Супертанкер туралы дерек жасырын қалды
Оқиға аймақтағы әскери шиеленіс қайта күшейген тұста болды. Ұлыбританияның Теңіз сауда операцияларын үйлестіру орталығы бұған дейін Оман жағалауы мен Ормуз бұғазындағы коммерциялық кемелерге қатысты бірнеше оқиғаны тіркеген. 6 тамызда бұғазбен өтіп бара жатқан танкер Оман жағалауына жақын маңда екі жарылыстың дыбысын естігенін хабарлаған. Сол жолғы оқиғада кеме мен экипаж аман қалған. UKMTO дерегін таратқан Anadolu агенттігі қоршаған ортаға да зиян келмегенін жазды.
АҚШ Орталық қолбасшылығы 30 тамызда Иранның Ларак аралындағы екі зымыран ұшыру қондырғысына соққы жасады. Вашингтонның нұсқасы бойынша, Ислам революциясы сақшылар корпусының әскери қызметкерлері теңіз миналарын орналастыруға және халықаралық кеме қатынасына шабуыл жасауға әзірленген. Иран америкалық операцияны арандатушылық деп бағалап, шабуыл салдарынан әскерилер мен бейбіт тұрғындар зардап шеккенін мәлімдеді. Reuters америкалық соққының нысанасы Ларак аралындағы екі қондырғы болғанын хабарлады.
Ормуз бұғазы Парсы шығанағын Оман шығанағы және Араб теңізімен жалғайды. Әлемдік мұнай саудасының қомақты бөлігі осы тар теңіз дәлізі арқылы өтеді. Сондықтан әрбір шабуыл, мина қаупі немесе навигациялық шектеу сақтандыру құнына, танкер қозғалысына және мұнай бағасына тікелей ықпал етеді.
Супертанкерге қатысты негізгі сұрақтар әзірге ашық күйінде қалып отыр. Кеменің атауы мен орналасқан жері, жүктің көлемі, экипаждың жағдайы және өрттің экологиялық салдары туралы расталған мәлімет жоқ. Оқиғаның нақты сипаты халықаралық теңіз құрылымдары мен кеме иесі ақпарат таратқаннан кейін айқындалмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
