2025 жылы республикалық бюджеттің кірістері 21, 4 трлн теңгеге жетті. Бұл туралы Мәжілістің жалпы отырысында Қаржы министрі Мәди Такиев мәлімдеді, деп жазады Ertenmedia. kz.
Министрдің айтуынша, трансферттерді есептемегендегі республикалық бюджеттің меншікті кірістері 15, 3 трлн теңгені құрап, өткен жылмен салыстырғанда 1, 8 трлн теңгеге артқан.
Салықтық түсімдер де айтарлықтай өскен. 2025 жылы бюджетке түскен салық көлемі 2, 2 трлн теңгеге немесе 17, 5 пайызға көбейді.
Қаржы министрлігі мұны экономикалық белсенділіктің артуымен, корпоративтік табыс салығы мен қосылған құн салығы бойынша түсімдердің ұлғаюымен, импорт көлемінің өсуімен және салықтық әкімшілендірудің тиімділігінің жақсаруымен байланыстырады.
Мәди Такиевтің мәліметінше, корпоративтік табыс салығы бойынша түсімдер бір жыл ішінде 880 млрд теңгеге өсіп, 4, 5 трлн теңгеге жеткен. Бұл өткен жылмен салыстырғанда 24 пайыздық өсімді көрсетеді.
Қосылған құн салығы бойынша да оң динамика байқалады. Осы салық түрінен бюджетке түскен қаражат көлемі 932, 5 млрд теңгеге ұлғайып, жалпы көлемі 6, 1 трлн теңгені құрады. Өсім 18 пайызға жеткен.
Министр сондай-ақ камералдық бақылау тетіктерінің тиімділігі артқанын айтты. Оның нәтижесінде бюджетке қосымша 388 млрд теңге өндірілген. Салыстыру үшін айтқанда, 2024 жылы бұл көрсеткіш 262 млрд теңге болған.
Сонымен бірге мемлекет бизнестің алдындағы міндеттемелерін орындауды жалғастырып отыр. Мәди Такиевтің сөзінше, 2025 жылы кәсіпкерлерге бюджеттен 1 трлн 354 млрд теңге көлемінде қосылған құн салығы қайтарылған. Бұл 2024 жылмен салыстырғанда 138 млрд теңгеге көп.
Сарапшылардың пікірінше, салықтық түсімдердің өсуі экономикадағы іскерлік белсенділіктің сақталғанын көрсетеді. Сонымен қатар бюджет кірісінің артуы әлеуметтік міндеттемелерді орындауға, инфрақұрылымдық жобаларды қаржыландыруға және мемлекеттік бағдарламаларды іске асыруға қосымша мүмкіндік береді.
Қаржы министрлігінің мәліметтері республикалық бюджет кірісінің негізгі бөлігін бұрынғыдай корпоративтік табыс салығы мен қосылған құн салығы қалыптастырып отырғанын көрсетті. Бұл көрсеткіштер ел экономикасындағы өндіріс, сауда және инвестициялық белсенділіктің маңызды индикаторы саналады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
