Қасым-Жомарт Тоқаевтың Оңтүстік Кореяға жасаған мемлекеттік сапары екі ел арасындағы байланысты тың деңгейге көтеріп, құны 19 миллиард долларды құрайтын коммерциялық құжаттармен бекітілді, деп хабарлайды Ertenmedia.kz.
Мемлекет басшысының Сеулге сапары Корея Президенті Ли Чжэ Мённің шақыруымен өтті. Мәртебелі мейманды ресми күтіп алу салтанатынан соң өткен жоғары деңгейдегі келіссөздер барысында қос мемлекет арасындағы байланысты болашаққа бағдарланған жан-жақты стратегиялық серіктестік деңгейіне көтеру туралы шешім қабылданды.
Қомақты инвестиция және өндірістік ынтымақтастық
Келіссөздердің басты өзегі сауда-экономикалық қатынастар мен инвестиция тарту мәселелеріне арналды. Осы уақытқа дейін Оңтүстік Корея Қазақстан экономикасына 12 миллиард доллардан астам қаржы салған. Жаңа жасалған келісімдер бұл қарқынды еселей түспек.
«Екіжақты қарым-қатынастарға келер болсақ, осы сапар аясында 19 миллиард доллар көлемінде коммерциялық келісімдерге қол қойылды. Біз кореялық инвесторлармен жұмыс істеуге дайынбыз және олардың сенімді жұмысына толық жағдай жасаймыз. Мұнай-газ химиясы, қала құрылысы және мейрамхана-қонақүй салалары бойынша нақты жобалар іске асады», – деді Қасым-Жомарт Тоқаев.
Сапар аясында белгілі болғандай, «Alatau City» смарт-қаласының жобасын дамытуға кореялық компаниялар белсенді атсалысады. Мемлекет басшысы шетелдік инвесторларға заңды әрі конституциялық кепілдіктер берілетінін қадап айтты. Бұдан бөлек, Hyundai Motor кәсіпорнымен көлік өндірісінің жаңа үлгілерін шығару, сондай-ақ энергетикалық кешендерді жаңғырту бағытында маңызды келісімдерге қол жеткізілді.
Аймақтық саммит және болашақ бастамалар
Қасым-Жомарт Тоқаев мемлекеттік сапар аясында Сеулде ұйымдастырылған бірінші «Орталық Азия – Корея Республикасы» саммитіне қатысты. Бұл жиында мемлекет басшылары көлік дәліздерін кеңейту, цифрландыру, сирек кездесетін металдарды бірлесіп өндіру және жасанды интеллект саласын дамыту бастамаларын талқылады.
«Былтыр Орталық Азия мен Кореяның өзара сауда-саттық көлемі алғаш рет 10 миллиард доллардан асты. Өңірдегі тауар айналымының жартысына жуығы Қазақстанға тиесілі», – деп атап өтті Мемлекет басшысы.
Қазақстан көшбасшысы Орталық Азия елдері мен Оңтүстік Корея арасында өнеркәсіптік және технологиялық әріптестік платформасын құруды ұсынды. Бұл бағыт озық инновациялар мен ғылыми жетістіктерді өндіріске тікелей енгізуге жол ашады.
Қоғам қайраткерлерін марапаттау және отандастармен жүздесу
Мемлекет басшысы Кореяның бірқатар қоғам және мемлекет қайраткеріне достық байланысты нығайтқаны үшін ІІ дәрежелі «Достық» орденін табыстады. Сондай-ақ сапар шеңберінде Корея Республикасында білім алып жатқан жастармен және осы елде еңбек етіп жүрген Қазақстан азаматтарымен кездесу өткізіп, олардың бастамаларына сәттілік тіледі.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
