Қазақстанның «Самұрық-Қазына» қоры Орталық Азияда алғаш рет Қытайдың ішкі нарығында юаньмен номиналданған панда-бондтар орналастырды, деп жазады Ertenmedia.kz.
Осы қадам өңірдегі ең ірі егеменді қордың Қытайдың борыштық нарығы мен ұлттық валютасына сенім білдіргенін аңғартты. Қор Қытайдың банкаралық нарығында 3 млрд юань көлемінде, шамамен 440 млн АҚШ долларына тең облигация сатты. Мәміле геосаяси тұрақсыздық күшейіп, инвесторлар қорғаныс активтерін іздей бастаған кезеңде жасалды.
Қор таратқан мәліметке қарағанда, үш жылдық облигациялар жылдық 2,18 пайыздық кірістілікпен орналастырылған. «Самұрық-Қазына» мұны рекордтық деңгейдегі төмен табыстылық ретінде бағалап отыр. Мұндай көрсеткіш Қытайдағы институционалдық инвесторлардың қор қағаздарына жоғары сенім артқанын көрсетті.
Өткен жылдың соңындағы есеп бойынша «Самұрық-Қазына» шамамен 88 млрд АҚШ долларына тең активті басқарады. Қор Қазақстандағы мемлекетке тиесілі активтерді басқаратын ең ірі құрылым саналады.
Қор басқарма төрағасы Нұрлан Жақыпов Астана халықаралық биржасындағы листинг рәсімінде аталған орналастыруды жаһандық капитал нарығына кірігудегі маңызды қадам деп атады. Оның сөзінше, қор Қытайдың ішкі нарығына алғаш рет шығып отыр.
Нұрлан Жақыпов осы шығарылым Қазақстан мен Қытай арасындағы стратегиялық әріптестікті нығайтқан маңызды белеске айналғанын да атап өтті.
Қытайдың ұлттық мұнай корпорациясы (CNPC) мен Qazaqgaz ұлттық компаниясы Ақтөбе облысында орналасқан «Северный-1» алаңында мұнай-газ қорын барлау бойынша міндетті келісімшартқа қол қойды. Бектенов үкіметі аталған кеніш елдің мұнай-газ өндірісіндегі ірі орталыққа айналады деп үміттеніп отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
