Жетісу облысында газдандыру жұмысы өңірдің әлеуметтік дамуына тікелей әсер етіп, ауыл мен қала арасындағы тұрмыс айырмасын азайта бастады, деп жазады Ertenmedia.kz.
Облыс құрылғаннан бері көгілдір отынға қосылған елді мекендер саны 5-тен 110-ға жетті. Соның нәтижесінде газдандыру деңгейі 27 пайыздан 67 пайызға дейін өсті. Бұл 467 мың тұрғынның табиғи газға қол жеткізуіне мүмкіндік жасалды деген сөз.
Мұндай көрсеткіш өңір үшін жай инфрақұрылымдық есеп емес, мыңдаған отбасының күнделікті тұрмысын жеңілдететін нақты өзгеріс.
Газ тарту жұмысы әсіресе ауылдық жерлер үшін маңызды. Себебі көмір тасу, күл шығару, қысқа дайындалу, пеш жағу сияқты бейнетті шаруа көп отбасына жақсы таныс. Көгілдір отын келген жерде үй жылыту жеңілдейді, тұрмыстық жайлылық артады, экологиялық жүктеме азаяды. Ең бастысы, ауылдағы өмір сапасы қаладағы жағдайға біртабан жақындайды.
Панфилов ауданында да газдандыру жұмысы жүйелі жүріп жатыр. Аудандағы 40 елді мекеннің 25-і газдандыруға жатады. 2025 жылы жалпы құны 5,7 млрд теңге болатын жоба аясында 13 елді мекенге газ тартылып, 15,4 мың тұрғын табиғи газға қол жеткізді. Осы кезеңде 178 шақырым газ құбыры салынды.
Қазір 2025 жылы басталған 12 ауыспалы нысан бойынша құрылыс жалғасып жатыр. Жобалардың жалпы құны 14,7 млрд теңгені құрайды. Жұмыс толық аяқталғаннан кейін 504 шақырым газ желісі салынып, тағы 46,4 мың адам көгілдір отынға қосылады.
Бұл аудан үшін үлкен серпін. Өйткені газдандыру тек үй жылыту мәселесін ғана шешпейді, шағын кәсіптің дамуына, әлеуметтік нысандардың тұрақты жұмыс істеуіне және ауылдың инвестициялық тартымдылығына да әсер етеді.
Панфилов ауданындағы халқы көп елді мекендердің бірі – Көктал ауылдық округі. Мұнда да газдандыру жұмыстары кезең-кезеңімен жүріп жатыр. Ақжазық пен Аққұдық ауылдарында желі толық тартылған. Ал Көктал елді мекеніндегі жұмыстың шамамен 40 пайызы аяқталды.
Көктал ауылдық округінің әкімі Батырбек Қадырбаевтың айтуынша, газ желісі жер астымен жүргізіліп жатқандықтан, тұрғындардың қауіпсіздігіне ерекше көңіл бөлінген. Мердігер мекемелер жер қазылатын көшелерде халыққа алдын ала ескерту жасап отыр. Әкімдік балалардың құрылыс жүріп жатқан аумаққа ретсіз шықпауын бақылауда ұстап келеді.
13 мыңға жуық тұрғыны бар ауылдық округте құрылыс сапасымен қатар, қазылған көшелерді қалпына келтіру мәселесі де назарда. Мердігерлер жер қазу жұмыстары аяқталған соң жолдың және аулаға кіретін тұстардың қайта реттелуін қамтамасыз етуі тиіс.
Сонымен бірге көше бойындағы үйлерге кіріп-шығу қиындамауы үшін шұңқырлардың үстіне уақытша көпірлер қойылып жатыр. Тұрғындар да осы жұмыстың жүргізіліп жатқанын айтып отыр.
Газ жеткен ауыл – жаңа тыныс
Ауылдың ардагерлер кеңесінің төрағасы Сайлау Солтанқұлов көгілдір отынның ауылға келуін көптен күткен игілік деп бағалады. Оның айтуынша, көмір тасып, күл шығарған күн артта қалса, ауыл тұрмысы біршама жеңілдейді. Мемлекет басшысы қала мен ауыл тұрмысын теңестіру қажеттігін жиі айтып келеді. Табиғи газдың жетуі осы бағыттағы нақты қадамдардың бірі саналады.
Ұзақ жыл ауыл мектебінде ұстаздық етіп, зейнетке шыққан Светлана Юсупова да газ тарту жұмысына қуанышты екенін жеткізді. Оның сөзінше, көгілдір отынды пайдалану ауыл тұрғындарының көптен бергі арманы болған. Енді бұрынғыдай көмір түсіріп, үйге отын кіргізіп, күл шығарудың азабы азаяды. Тұрғындар заманауи әрі жайлы өмірге жақындай түспек.
Жетісу облысында жалпы газдандыру ауқымы кеңейіп келеді. Бүгінде Кербұлақ ауданынан Талдықорған қаласына дейінгі аумақта, Панфилов ауданын қоса алғанда, 110 елді мекен газдандырылды. Қалған 16 елді мекенді газға қосу жұмыстары биыл аяқталады деп жоспарланып отыр.
Сонымен бірге өткен жылы «Талдықорған-Үшарал» магистралды газ құбырының құрылысы аяқталды. Ақсу, Сарқан және Алакөл аудандарындағы 84 елді мекенді табиғи газбен қамту үшін жеке инвестициялар есебінен жобалау-сметалық құжаттама әзірленді. Бұл бағыттағы газ тарту жұмыстары биыл басталмақ.
Жоспар толық іске асса, 2028 жылы Жетісу облысында 210 елді мекенге газ тартылып, 652,3 мыңнан астам тұрғын немесе жалпы халықтың 93,8 пайызы көгілдір отынға қол жеткізеді. Бұл өңір үшін үлкен әлеуметтік өзгеріс болмақ.
Себебі газдандыру ауылдағы өмір сапасын арттырып, тұрғындардың тұрмыстық шығынын азайтады, экологияға оң әсер етеді және елді мекендердің болашақ дамуына негіз қалайды.
Көгілдір отын келген ауылдың тынысы өзгереді. Пештің түтіні азаяды, қысқы дайындық жеңілдейді, үй ішіндегі жайлылық артады. Сондықтан Жетісудағы газдандыру жұмыстары жай ғана құбыр тарту емес, халықтың күнделікті өміріне әсер ететін үлкен әлеуметтік жоба ретінде бағалануы керек.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
