Жетісу облысында соңғы төрт жылда жергілікті маңызы бар 1 610,6 шақырым автомобиль жолы жөнделді, деп жазады Ertenmedia.kz.
Жетісу облысы әкімдігінің мәліметінше, осы кезеңде 660,4 шақырым облыстық маңызы бар жол және 148 елді мекендегі ұзындығы 950,2 шақырым ауылішілік көше қамтылған. Облыс орталығы Талдықорғанда шамамен 335 шақырым жергілікті жол жөндеуден өтті.
Биыл Талдықорған қаласында жол инфрақұрылымын жаңарту бойынша ауқымды жұмыс жоспарланған. Жоба 118 көшені қамтиды. Жалпы 70 шақырымнан астам жолға жаңа асфальт төселеді.
Қалалық жолаушылар көлігі және автомобиль жолдары бөлімінің басшысы Ерлан Ниетбаевтың айтуынша, сәуір айының ортасынан бастап қаланың орталық бөлігіндегі сегіз көшеде орташа жөндеу жұмысы жүргізіліп жатыр. Атап айтқанда, Абай, Абылай хан, Ескелді би көшелері, Нұрсұлтан Назарбаев даңғылы, сондай-ақ Шевченко, Желтоқсан, Ақын Сара және Біржан сал көшелері қамтылған. Бұл учаскелердің жалпы ұзындығы 30,2 шақырым.
Биылғы жөндеу жұмысының бір ерекшелігі – аталған көшелерде икемді люктер орнатылады. Мұндай люк кәріз құдығының бетон сақинасына емес, тікелей жол жабынына бекітіледі. Ол температура өзгергенде немесе топырақ шөккен кезде жолмен бірге қозғалып, асфальттың опырылуына және құдық мойнының бұзылуына жол бермейді. Нәтижесінде жол беті тегіс сақталады.
Өткен жылы мұндай технология Гагарин көшесінде пилоттық жоба ретінде қолданылып, оң нәтиже көрсеткен. Биыл Талдықорғанда 694 икемді люк орнату жоспарланып отыр.
Сонымен қатар 8-шағын аудан мен «Жастар-3» тұрғын алабында жол құрылысы жүріп жатыр.
Биыл «Жастар-1» тұрғын алабындағы 53 көшенің, «Құлагер» және «Бірлік» шағын аудандарындағы 5 көшенің құрылысы аяқталмақ. «Көктал» тұрғын алабындағы 36 көшеде және 3-бөлімшедегі 20 көшеде де жұмыс жалғасуда.
Қазір облыс орталығында 15 мердігер ұйым жұмыс істеп жатыр. Жол жөндеу жұмыстарына 200 бірлік арнайы техника тартылған.
Жөндеу аяқталған учаскелер кезең-кезеңімен пайдалануға беріліп жатыр. Тұрғындар жол жөндеу кезінде уақытша қолайсыздық болғанымен, оның нәтижесі қала қозғалысы үшін маңызды екенін айтуда.
Жөндеу жұмыстары барысында жол белгілері де жаңартылады. Жоспар бойынша 100 жол белгісі ауыстырылып, 300 жаңа белгі орнатылады.
Абылай хан мен Тынышбаев көшелерінің қиылысына бағдаршам қойылады. Жол таңбалары термопластик материалымен сызылады. Бұл әсіресе түнгі уақытта таңбалардың анық көрінуіне және қозғалыс қауіпсіздігін арттыруға мүмкіндік береді.
Ай басында облыс орталығында арнайы жұмыс комиссиясы құрылған. Комиссия жол жөндеу сапасын барлық кезеңде бақылап отырады. Яғни жөндеу басталған сәттен бастап нысанды қабылдау және кейін пайдалану кезеңіне дейін сапа назарда болады.
Комиссия жұмысы тек Талдықорғанмен шектелмейді. Жол жөндеу жүргізіліп жатқан өңірдегі басқа елді мекендер де бақылауға алынады.
Жалпы, Жетісу облысындағы автомобиль жолдарының ұзындығы 4 035 шақырымды құрайды. Оның 1 050 шақырымы республикалық маңызы бар жолдарға, 2 985 шақырымы жергілікті жолдарға жатады.
Өңір үшін жол сапасы күнделікті қатынас қана емес, ауыл мен қала арасындағы байланыс, экономикалық белсенділік және тұрғындардың қауіпсіз қозғалысы үшін маңызды инфрақұрылым саналады. Сондықтан биылғы жөндеу жұмыстары Талдықорғанның ғана емес, жалпы Жетісу облысының көлік жүйесін жаңартуға бағытталған нақты қадам болып отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
