Қазақстан 2027 жылғы үстел теннисінен әлем чемпионатын өткізу эстафетасын ресми түрде қабылдады, деп жазады Ertenmedia.kz.
Халықаралық үстел теннисі федерациясының туын табыстау рәсімі Лондонда өтіп жатқан қазіргі әлем чемпионаты алаңында ұйымдастырылды. Осы сәттен бастап Қазақстан әлемдегі ең ірі халықаралық спорттық жарыстардың бірін қабылдайтын ел мәртебесіне ресми түрде ие болды.
Үстел теннисінен әлем чемпионаты 2027 жылғы 22-30 мамыр аралығында Астанада өтеді. Қазақстан Орталық Азия елдері ішінде бұл турнирді алғаш қабылдайтын мемлекет атанып отыр. Мұндай деңгейдегі жарыс отандық спорттың дамуына ғана емес, елдің халықаралық беделін нығайтуға да ықпал етеді.
Чемпионатқа спортшылар, жаттықтырушылар, ұлттық федерациялар өкілдері, төрешілер және халықаралық делегаттарды қоса алғанда шамамен 1250 ресми адам келеді деп күтіледі. Сонымен қатар жарыс шетелдік жанкүйерлер мен елорда қонақтарының келуіне жол ашады.
Әлем чемпионаты бес санат бойынша өтеді. Олар – ерлер мен әйелдер арасындағы жекелей сын, ерлер мен әйелдер жұбы және аралас жұптар бәсекесі.
Негізгі жарыс алаңы ретінде 8 мыңға жуық көрермен сиятын «Барыс Арена» мұз сарайы таңдалды. Қосымша алаң ретінде 6,8 мың адамға арналған QAZAQSTAN жеңіл атлетика кешені пайдаланылады.
Чемпионат аясында Астанада ITTF Summit 2027 іс-шарасы да өтеді. Оның құрамына Халықаралық үстел теннисі федерациясының жыл сайынғы Бас ассамблеясы мен Атқару комитетінің отырыстары кіреді.
2027 жылғы әлем чемпионатын Қазақстанда өткізу туралы шешім 2025 жылғы 27 мамырда Қатардың Доха қаласында өткен ITTF Бас ассамблеясында қабылданған. Турнирді өткізу құқығына Қазақстанмен бірге Франция, АҚШ, Қытай және Бразилия үміткер болды. Финалда Қазақстан 54,68 пайыз дауыс жинап, жеңіске жетті.
Ұйымдастыру комитеті Астанада әлем чемпионатының өтуі Қазақстанда үстел теннисінің жаңа деңгейге көтерілгенін көрсететінін атап өтті. ITTF өкілдері туды Қазақстанға табыстау елге көрсетілген сенімнің белгісі екенін мәлімдеді.
Бұл турнир Қазақстан үшін жай спорттық жарыс емес. Ол елдің ұйымдастырушылық әлеуетін, инфрақұрылымын және халықаралық спорт аренасындағы орнын көрсететін үлкен мүмкіндік болмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
