Атырауда өткен «Қазыналы Каспий – 2026» фестивалі Каспий экожүйесін сақтау, балық шаруашылығын дамыту және акваөсіру саласына жаңа серпін беру мәселесін кең талқылаған халықаралық алаңға айналды, деп жазады Ertenmedia.kz.
Фестиваль аясында теңіз экологиясын қорғау, балық қорын көбейту, заманауи технология енгізу және экологиялық мәдениетті қалыптастыруға бағытталған бірқатар іс-шара ұйымдастырылды. Каспий маңы елдері үшін ортақ маңызы бар тақырыптар форум мінберінде де, практикалық акциялар барысында да көтерілді.
Халықаралық форумда Атырау облысының әкімі Серік Шәпкенов Каспий теңізіндегі экологиялық тепе-теңдікті сақтау үшін мемлекетаралық әріптестікті күшейту қажет екенін айтты. Оның сөзінше, климаттың өзгеруі, теңіз деңгейінің құбылуы және антропогендік қысымның артуы балық қорын сақтауды бұрынғыдан да өзекті етіп отыр.
Сондықтан ғылыми тәжірибе алмасу, инновациялық шешім енгізу және өндірістік мәдениетті жаңарту сала дамуының басты шартына айналған.
ҚР Ауыл шаруашылығы министрлігі Балық шаруашылығы комитетінің төрағасы Серік Сермағамбетов Атырау облысының елдегі балық шаруашылығы үшін стратегиялық рөлін атап өтті. Қазір Қазақстанда жыл сайын 50 мың тоннаға жуық балық ауланса, соның 19 мың тоннадан астамы Жайық-Каспий бассейнінің үлесіне тиеді. Өңірде жалпы құны 60 миллиард теңгеден асатын 40-тан астам инвестициялық жоба жүзеге асырылып жатыр.
Сол жобалардың қатарында Каспий теңізінде норвегиялық технология бойынша форель өсіруді қолға алған «Organic Fish» компаниясы бар. Мұндай бастамалар өңірдегі дәстүрлі балық шаруашылығын жаңа акваөсіру мәдениетімен толықтырып, теңіз ресурсын тек аулаумен емес, ғылыми негізде көбейтумен ұштастыруға мүмкіндік береді.
Атырау өңірі бекіре тұқымдас балықты сақтау және көбейту бағытында да маңызды жұмыс атқарып келеді. Атырау бекіре балық өсіру зауыты жыл сайын табиғи ортаға 5 миллион шабақ жібереді. Қазіргі жаңғырту аяқталғаннан кейін зауыттың өндірістік қуаты 7,4 миллион шабаққа дейін артады. Соңғы 30 жылда Қазақстан Каспий теңізіне 180 миллионға жуық бекіре шабағын жіберген.
Каспийге 3000 бекіре жіберілді
Фестиваль кезінде Жайық өзенінің балық қорын толықтыру мақсатында экологиялық акция өтті. Мамандар өзенге 3000 бекіре шабағын жіберді. Ұйымдастырушылар мұндай қадам су айдынының табиғи тепе-теңдігін сақтауға, бекіре қорын молайтуға және келешек ұрпаққа тұрақты экожүйе қалдыруға бағытталғанын атап өтті.
Бағдарлама аясында әуесқой балықшылар арасында турнир де ұйымдастырылды. Оған Атырау облысы мен Ақтөбе өңірінен келген 48 қатысушыдан құралған 14 команда қатысты. Турнирдің басты ерекшелігі ауланған балықтың қайтадан суға жіберілуінде. Мұндай қағида табиғи ресурсты ұқыпты пайдалануға және жауапты балық аулау мәдениетін қалыптастыруға үндейді.
Фестивальде балық өнімдерінен тағам дайындау бойынша аспаздар байқауы да өтті. Оған Атыраудың тоғыз үздік аспазы қатысып, Жайық өзенінен ауланған балықтан түрлі тағам әзірледі. Қазылар алқасы тағамның дәмдік сапасын, ұсынылу мәдениетін және жергілікті өнімді қолдану ерекшелігін бағалап, үздіктерді анықтады.
Осылайша «Қазыналы Каспий – 2026» фестивалі тек мерекелік бағдарлама емес, Каспийдің экологиялық болашағы, балық шаруашылығының жаңа бағыты және өңірдің инвестициялық әлеуеті талқыланған мазмұнды алаң ретінде өтті. Форумда көтерілген бастамалар Атыраудың балық шаруашылығындағы жетекші орнын күшейтіп, Каспий маңы кеңістігінде ортақ жауапкершілік мәдениетін қалыптастыруға бағытталған.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
